Atopan morto o dono dun bar en Ourense con feridas de arma branca

A Unidade de Delincuencia Especializada e Violenta (UDEV) da Policía Nacional investiga a morte violenta do dono dun bar situado no casco antigo da cidade de Ourense.

Polo momento, a investigación apunta a que o home achado morto nun bar no casco antigo de Ourense á primeira hora da noite deste mércores supostamente faleceu por feridas causadas por arma branca.

Así o manifestaron fontes próximas á investigación a Europa Press, que confirmaron que a Policía Nacional investiga a morte violenta deste home.

En concreto, a Unidade de Delincuencia Especializada e Violenta (UDEV) da Policía Nacional investiga a morte violenta do home que rexentaba o Bar Novo, situado no casco antigo da cidade de Ourense.

Os feitos sucederon sobre as 20,30 horas deste mércores no Bar Novo. A vítima, que rexentaba o establecemento hostaleiro, atopábase falecido e presentaba feridas por arma branca e golpes.

O establecemento hostaleiro, situado na rúa Colón, estaba pechado ao público cando os axentes da Policía Nacional chegaron ao local e constataron que o home estaba morto.

Ao lugar, sinalaron a Europa Press fontes sanitarias, ademais, acudiron medios do 061 cunha ambulancia de soporte vital avanzado, cuxo persoal confirmou o falecemento no lugar do home, E.M.M., de 65 anos de idade.

ESPERAR POLA AUTOPSIA

O delegado do Goberno en Galicia, Javier Losada, avogou este xoves por esperar ao resultado da autopsia e á investigación policial para aclarar a morte. "É unha investigación que ten dúas frontes", en relación á "investigación policial na súa xeneralidade e outra, a da autopsia", indicou.

"Só podo comentar neste momento o que fai a Policía, que é valorala como unha posible morte de non causa natural", comentou o delegado do Goberno, que engadiu que "dá a sensación de que houbo algunha cuestión que ten que ver con violencia". "Pero imos esperar ao resultado da autopsia e a investigación que estableceu por aí a Policía", apostilou.

Por iso, sostivo que "neste momento" é "esa hipótese de violencia" a que barallan os investigadores. "Agora imos ir aos poucos", concluíu, para lembrar que non pasaron "24 horas".