Galicia é das autonomías que máis aumenta o uso do autobús urbano

Con respecto ao 2018, o transporte urbano incrementou os seus viaxeiros nun 5,7%.

Por E.P. | SANTIAGO DE COMPOSTELA | 11/02/2020 | Actualizada ás 10:54

Comparte esta noticia

O transporte urbano por autobús rexistrou o pasado decembro de 2019 os 5.273.000 viaxeiros, o que supón un incremento do 5,7% con respecto ao mesmo mes do 2018, segundo os datos publicados este martes polo Instituto Galego de Estatística (IGE).

De acordo con este informe, a galega sitúase como a cuarta autonomía que máis aumenta o uso deste medio de transporte, tras Euskadi (+8,7%), Cataluña (+5,9%) e Asturias (+5,8%) e empatada con Canarias (+5,7%).

Ademais, os case 5,3 millóns de viaxeiros en autobús do mes de decembro en Galicia supoñen un aumento do 2,9% con respecto ao uso medio mensual desta modalidade de transporte de todo o 2019.

Bus, autobús, plan de transporte. XUNTA - Arquivo
Bus, autobús, plan de transporte. XUNTA - Arquivo | Fonte: Europa Press

TRANSPORTE PÚBLICO EN TODA ESPAÑA

En canto aos datos de todo o Estado, o número de viaxeiros que utilizaron calquera modalidade de transporte público foi de máis de 5.081,5 millóns de pasaxeiros, un 3,6% máis que en 2018.

Máis concretamente, o transporte urbano aumentou un 3,1%, sendo utilizado por máis de 3.107,2 millóns de viaxeiros. O metro aumentou un 2,4% en taxa anual con 1.275,6 millóns de usuarios, mentres que o transporte urbano por autobús aumentou un 3,6% en 2019 respecto de 2018 ata os 1.831,6 millóns.

O metro de Palma presenta o maior incremento (20,9%) e o de Bilbao o único descenso (-0,5%). Entre as cidades que posúen metro, a maior subida no transporte por autobús rexístrase en Bilbao (13,8%) e a única baixada en Madrid (-6,8%).

OUTROS MEDIOS DE TRANSPORTE

Ademais, o informe publicado polo INE este martes recolle datos estatais doutros medios de transporte. Así, os viaxeiros que utilizaron o avión para desprazarse polo interior de España aumentou un 6,4% en 2019 respecto ao ano anterior, mentres que os que elixiron os trens AVE subiron un 4,9%.

En concreto, máis de 42,8 millóns de usuarios utilizaron o transporte aéreo o ano pasado, cifra superior aos que escolleron o tren de Longa Distancia para os seus desprazamentos, con 34,5 millóns. Dentro deste segmento, os viaxeiros que utilizaron o AVE sumaron 22,3 millóns de usuarios.

O transporte ferroviario foi utilizado por máis de 636 millóns de viaxeiros, un 1,7% máis que en 2018, dos cales 568 millóns corresponderon a usuarios de proximidade (+1,7%); 33,2 millóns a Media Distancia (+1,1%), e 34,5 millóns a Longa Distancia (+2,7%).

Pola súa banda, o transporte por autobús foi utilizado por 731 millóns de viaxeiros en 2019, cifra un 5,4% superior á de 2018, mentres que o transporte marítimo subiu un 5,9%, ata os 11,7 millóns de usuarios. En conxunto, o número de viaxeiros do transporte interurbano aumentou un 3,7% en 2019 respecto de 2018, ata superar os 1.422 millóns de viaxeiros.

TRANSPORTE ESPECIAL

Máis de 552 millóns de usuarios utilizaron o transporte especial e discrecional en 2019, o que supón un incremento do 5,9% en taxa anual. O número de pasaxeiros do transporte especial subiu un 5,1 superou os 331 millóns de usuarios, mentres que o discrecional aumentou un 7,1% ata alcanzar os 220 millóns de viaxeiros en 2019.

En decembro, máis de 38,7 millóns de usuarios utilizaron transporte especial e discrecional, o que supón un incremento do 6,8% en taxa anual. O número de pasaxeiros do transporte especial subiu un 4,1% e superou os 24,9 millóns de usuarios. Dentro deste, o escolar aumentou un 2,3% e o laboral un 10,1%.

Pola súa banda, o transporte discrecional creceu un 11,9% respecto ao mesmo mes do ano 2018, con máis de 13,7 millóns de viaxeiros.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta