Traballadores de Ferroatlántica urxen medidas ante "o desmantelamento" das fábricas
Este xoves o comité proporá un calendario de mobilizacións.
- Cae un 4% a produción industrial en Galicia en 2019, unha das maiores caídas do Estado
- Traballadores de Ferroatlántica concéntranse este venres en Cee para volver reclamar un plan de viabilidade
Por Europa Press / Redacción | SANTIAGO DE COMPOSTELA | 12/02/2020 | Actualizada ás 19:06
O comité de empresa de Ferroatlántica Cee - Dumbría - Centrais Hidroeléctricas reclamou unha reunión "urxente" coa Xunta de Galicia e a propia compañía para abordar a "grave situación" que está a xerar "o desmantelamento das fábricas" e o "recorte drástico da produción" que levou ao "peche" do forno 13.
Así o deu a coñecer o propio comité este mércores a través dun comunicado, debido á "necesidade inaprazable de esixir da nova xerencia de Ferroatlántica un plan de viabilidade" que "garanta os niveis de produción e o mantemento dos empregos".
O escenario actual sitúa a factoría galega "ao 30 por cento da súa capacidade de fabricación" de ferroaleación, mentres que a "produción de electricidade funciona ao 100%" o que, "confirma que o único interese de TPG-Ithaka está no negocio da enerxía e que a operación orquestrada con FerroGlobe é unha fraude", denuncia o comité.
Ademais, destacaron que o forno 13 "non ten data concreta para o seu arranque" e que o resto "están sometidos a un plan de paradas de entre dez e catorce horas diarias" que provoca "avarías con riscos" continuos.
Ao seu xuízo, esta "drástica redución da produción" só pode xustificarse por "a grave situación económica de FerroGlobe que impide por falta de liquidez comprar materias primas para a plena produción".
"PRECARIEDADE E INESTABILIDADE"
Por outra banda, o comité tamén considera que "Ferroglobe dá prioridade á produción noutras fábricas" e "recorta a actividade de Cee e Dumbría". Por iso, "a Xunta ten que esixir de inmediato a Ferroatlántica un plan de viabilidade que garanta a actividade industrial e os postos de traballo".
Respecto destes últimos, puxeron o foco no "recorte do persoal" e "a progresiva deterioración das condicións de traballo" que aumenta a "precariedade e a inestabilidade", concluíu.
Este cúmulo de circunstancias provocou que o comité decida convocar dúas asembleas de traballadores para este xoves, 13 de febreiro, ás 10,00 horas en Brens e ás 11,30 horas en Dumbría, para propor un calendario de mobilizacións.
