O TSXG ratifica a condena a Ferroatlántica por despedir un traballador por facer uns comentarios en redes
Obríga a empresa á readmisión inmediata do empregado e a pagarlle unha indemnización.
Por E.P. | A CORUÑA | 19/02/2020 | Actualizada ás 19:17
O Tribunal Superior de Xustiza de Galicia (TSXG) ratificou a condena a Ferroatlántica polo despedimento dun traballador de Cee, que foi membro do comité e actualmente forma parte da sección sindical da CIG.
Segundo informa esta central sindical, o alto tribunal galego declarou a nulidade da decisión "xa que a empresa vulnerou o dereito fundamental da liberdade de expresión na súa vertente de liberdade de expresión sindical".
"Ademais de ordenar a reincorporación inmediata do traballador nas mesmas condicións que tiña, a resolución do TSXG ratifica tamén a condena de pago dunha indemnización no grao de infracción moi grave", engade.
A central sindical lembra que o traballador foi despedido, tras 28 anos na fábrica de Cee, a finais de 2018 "despois de publicar un comentario nunha rede social, fóra do ámbito da empresa, e nun clima de gran tensión sindical, con posturas enfrontadas dentro do comité, e xusto catro días antes da celebración do referendo polo cal saíu aprobado o convenio colectivo", lembra.
No seu momento, a CIG denunciou que esta decisión "non viña motivada polo prexuízo para a empresa ou o contido do propio comentario (que o traballador eliminou poucos días despois), senón que era unha represión de Ferroatlántica contra a CIG".
"Pola loita contra a frustrada tentativa de vender os saltos de auga do ano 2017, non referendar o acordo marco estatal e non asinar o novo convenio colectivo para as fábricas de Cee e Dumbría e as centrais hidroeléctricas", apostila.
