A Xunta seguirá coa vía xudicial contra o Goberno central "mentres persista a crise do IVE"

O conselleiro de Facenda, Valeriano Martinez, asegurou que a Xunta seguirá coa vía xudicial contra o Goberno "mentres persista a crise do IVE" e o Executivo estatal non abone a Galicia os 200 millóns pendentes da recadación de decembro de 2017.

"Mentres persista a crise do IVE común a todas as comunidades autónomas e, ata certo punto ás corporacións locais, nós imos seguir tendo activada a vía xudicial, porque é algo que nos corresponde a todas as galegas e galegos", manifestou o conselleiro nunha entrevista concedida á TVG.

O titular de Facenda considerou que se trata dunha "cortina de fume que está a tapar outro tipo de situacións", "como poden ser a falta de pagamentos que neste momento segue mantendo o Goberno central respecto das comunidades autónomas" e que, no caso de Galicia, ascenden a "algo máis de 370 millóns". Ademais, definiu todas estas medidas como unha técnica para "enmarañar o partido".

Valeriano Martínez sinalou que "as débedas hai que devolvelas" e sostivo que estes fondos son os que permiten "pagar dunha maneira correcta" a sanidade galega, a educación e os servizos sociais. "A iso queremos dedicarnos con alegría e ilusión, como fixemos nestes últimos 11 anos e como esperamos facelo nos próximos", indicou.

Por último, sobre a rebaixa das previsións de crecemento para España, o conselleiro de Facenda advertiu dunha "desaceleración importante" pero asegurou que se "está en positivo". "Non nos durmamos, pero tampouco nos obsesionemos", finalizou.