Feijóo promete unha oficina de impulso empresarial nas Pontes
Formoso destaca o "permanente interese" da Xunta e a "coordinación" para buscar un "futuro" ao municipio
Por Europa Press / Redacción | SANTIAGO DE COMPOSTELA | 26/02/2020 | Actualizada ás 18:07
O presidente da Xunta, Alberto Núñez Feijóo, comprometeu este mércores crear unha oficina de impulso empresarial nas Pontes de García Rodríguez, localidade afectada pola situación de Endesa, e avanzou que na mesa convocada para o próximo 10 de marzo en Madrid --Ministerio de Transición Ecolóxica, Xunta, Concello e empresa-- pedirá eliminar "o céntimo verde" para estas industrias.
Nesta mesma mesa, o Executivo autonómico pedirá conseguir máis fondos europeos, xa que "lamentablemente España só conseguiu 300 millóns de euros para a transición, mentres que Alemaña preto de 900 millóns de euros e Polonia case 2.000".
Na reunión, á que tamén asistiu o conselleiro de Economía, Emprego e Industria, Francisco Conde, cos integrantes do grupo de traballo --formado polos grupos municipais con representación no Concello, sindicatos, comité de empresa de Endesa nas Pontes, transportistas, empresarios e comerciantes--; Feijóo precisou que impulsará a "creación dunha oficina nesta localidade, entre a Deputación da Coruña e a Xunta, para apoiar calquera iniciativa de tipo empresarial que se poida conseguir para As Pontes".
Nesta liña, comprometeu que "a Xunta estará en calquera tipo de iniciativa de ampliación do chan industrial neste municipio, con outras administracións, tanto provinciais como estatais", reclamacións que lle realizou o alcalde desta localidade, Valentín González Formoso (PSOE).
O tamén presidente da Deputación da Coruña destacou e agradeceu "o permanente interese tanto do presidente da Xunta como do conselleiro de Industria cada día, sempre coas portas abertas" e remarcou que "se non houbese esta coordinación, isto sería imposible, e As Pontes non tería futuro".
Formoso destacou que "isto é a base para que todo este proxecto, tanto a continuidade da central térmica como as alternativas de reindustrialización se vaian dar nas Pontes, e que sexan posibles".
BIOCOMBUSTIBLES
En canto ás probas que está previsto realizar neste complexo coa utilización doutros combustibles, ademais do carbón, o rexedor trasladou que "van determinar con certeza se esta central é viable técnica e economicamente e así decidir a súa continuidade con biocombustibles".
Así, asegurou que o obxectivo do seu Goberno é "manter operativa esta central, porque cumpre os regulamentos europeos" e remarcou que "a maioría de países manteñen as súas central térmicas abertas e operativas, ata 140, neste momento".
"Imos seguir traballando de maneira coordinada e consensuada porque é a única maneira de manter un posicionamento firme e razoable dentro dunha transición que queremos que sexa ordenada", insistiu.
ENCONTRO DE TRABALLO
O mandatario autonómico desprazouse ata As Pontes de García Rodríguez este mércores, onde mantivo un encontro de traballo co grupo de crise desta localidade, que busca evitar o peche da central térmica que a compañía Endesa ten neste municipio.
"Esta é a gran batería de España", incidiu Feijóo en referencia a este complexo xerado de enerxía eléctrica, composto por catro grupos e unha potencia de 1.400 MW. Iso levoulle a asegurar que "estamos ante unha central imprescindible desde o punto de vista de seguridade eléctrica no país", polo que defendeu que hai que "ser capaces de convencer ao Goberno central e a Endesa de que ningunha formulación pode ser distinta a manter este central térmica operativa".
Con esta idea, dixo Feijóo, seguirán "traballando tal e como o levamos facendo nos últimos meses, co Inega e os técnicos de Endesa", para ver como podemos ir diminuíndo as toneladas de carbón e a súa substitución por biocombustibles, para evitar ser penalizados como consecuencia das emisións de CO2.
MENSAXE DE SOLIDARIEDADE
Feijóo tamén quixo mandar unha mensaxe de solidariedade para as "750 familias" que dependen deste complexo xerador e destacou a situación que están a vivir os "transportistas, que levan meses sen poder facturar e que se enfrontan a préstamos para poder comprar os seus camións".
Esta situación tamén levou os operarios das empresas auxiliares a ter "unha gran preocupación e incerteza", sobre o seu futuro laboral, xa que "non poden recibir un peche por resposta".
