Alerta laranxa na costa da Coruña e Lugo por fortes ventos desde esta madrugada
Nas montañas das provincias de Lugo e Ourense tamén hai aviso de neve.
Por E.P. | SANTIAGO DE COMPOSTELA | 04/03/2020 | Actualizada ás 20:05
A Xunta elevou a alerta laranxa o nivel de perigo no litoral da Coruña e Lugo debido aos fortes ventos que azoutarán a costa galega a partir desta madrugada e que se prolongarán ao longo deste xoves.
Segundo informa a Axencia Estatal de Meteoroloxía (Aemet), este fenómeno meteorolóxico adverso traerá ventos do oeste e noroeste que poden alcanzar forza oito nas rexións sinaladas.
Ademais, Meteogalicia tamén puxo en alerta amarela ao resto do litoral galego por forte ondada e vento, así como nas montañas das provincias de Lugo e Ourense por perigo de neve, onde se poden acumular ata 5 centímetros durante as últimas horas do día.
No mar, a alerta laranxa estará activada por vento entre as 06,00 e as 12,00 horas. Ao mesmo tempo manterase o aviso amarelo ao longo de toda a xornada e poderanse alcanzar refachos de ata 80 quilómetros por hora na Mariña lucense. Meteogalicia espera ondas de entre catro e cinco metros no resto da costa galega.
Por este motivo, a Dirección Xeral de Emerxencias e Interior informou da situación aos concellos e ás provincias afectadas, así como deputacións e servizos provinciais e agrupacións de voluntarios de Protección Civil, para que tomen as medidas oportunas.
O Goberno galego lembra a importancia de manterse afastados da liña de costa e, en xeral, de todas aquelas zonas que poidan ser varridas polo mar, co fin de previr un eventual golpe de mar que poida arrastrar persoas ou obxectos.
Tamén se aconsella a suspensión das actividades pesqueiras e marisqueiras como medida preventiva naquelas zonas máis perigosas e extremar as medidas de seguridade á hora de realizar calquera actividade no mar.
