O PPdeG substitúe os emblemas da Xunta polo emoticono de "ok" no vídeo de Los Limones
A Xunta Electoral Central mandara modificalo ou retiralo tras as denuncias do BNG e PSOE.
- VÍDEO: Feijóo repite por cuarta vez con Los Limones para pór banda sonora á súa campaña coa canción 'Galicia é moito'
- A xunta electoral ordena "retirar ou modificar" o vídeo 'Galicia é moito' da campaña de Feijóo
Por Europa Press / Redacción | SANTIAGO DE COMPOSTELA | 09/03/2020 | Actualizada ás 17:21
O PPdeG, en cumprimento de dúas resolucións da xunta electoral central (JEC) por mor de senllas denuncias do BNG e PSOE, cambiou o seu vídeo promocional de campaña, con letra de Los Limones. Así, substituíu os emblemas e simboloxía institucional por bandeiras co emoticono de "ok", a man con puño pechado e pulgar levantado.
O pasado venres transcendeu que a xunta electoral estimara parcialmente a denuncia do BNG e obrigaba a retirar ou modificar o vídeo de promoción do candidato do PP á Xunta, Alberto Núñez Feijóo. Agora tamén se coñece que os socialistas denunciaran a montaxe musical e pedían, ademais, unha multa de 3.000 euros en concepto de infracción electoral.
Unha vez visionado o vídeo, a xunta electoral constatou que aparecía ao redor de 24 veces unha bandeira coa palabra Xunta, de "tipografía coincidente á empregada pola institución".
A xunta electoral ordenou retirar ou modificar o vídeo, atendendo a que á "posible confusión implícita que nos electores poida provocar a difusión do vídeo" entre a entidade política PP e a institución autonómica Xunta. O PPdeG deu cumprimento en días pasados á resolución da xunta electoral.
