O deputado Antón Gómez-Reino, positivo por coronavirus
Garda corentena na súa casa desde o xoves, cando coñeceu nunha rolda de prensa que Irene Montero dera positivo por COVID-19.
Por Europa Press / Redacción | SANTIAGO DE COMPOSTELA | 17/03/2020 | Actualizada ás 11:59
O deputado de Galicia en Común e secretario xeral de Podemos Galicia, Antón Gómez-Reino, deu positivo na proba do coronavirus, segundo anunciou el mesmo a través das súas redes sociais.
O tamén candidato á Presidencia da Xunta da coalición Galicia En Común-Anova Mareas atópase en corentena desde o mediodía do pasado xoves tras coñecerse o positivo por COVID-19 da súa compañeira de grupo parlamentario e ministra de Igualdade, Irene Montero.
De feito, Gómez-Reino coñeceu a noticia durante o transcurso dunha rolda de prensa ofrecida en Santiago na que estivo acompañado pola cabeza de lista por Pontevedra da coalición, Eva Solla, e o número tres pola Coruña, Martiño Noriega.
Desde ese momento anunciou unha corentena na súa vivenda da Coruña e, segundo sinala nas súas redes sociais, chamou ao teléfono habilitado pola Xunta para informar de que proviña dunha zona de risco (Madrid) e estivera en contacto con persoas infectadas.
Finalmente, Gómez-Reino foi sometido á proba do coronavirus o pasado domingo no seu domicilio, ao que se desprazou unha unidade do Servizo Galego de Saúde. De feito, o luns recoñeceu ter síntomas na rolda de prensa telemática ofrecida tras a reunión co presidente da Xunta, Alberto Núñez Feijóo, e o resto de líderes das principais forzas políticas galegas.
"Tras seis días de corentena acabo de dar positivo na proba do COVID-19. Continúo traballando desde casa e pronto para seguir, como ata agora, todas as prescricións sanitarias para frear a expansión do virus. Imos superar estas crises unidas, sen deixar a ninguén atrás", manifestou Gómez-Reino no seu perfil de Twitter.
Ademais, o parlamentario do Grupo Confederal de Unidas Podemos, que se une a outros congresistas que deron positivo en Covid-19 (como a popular Ana Pastor), destacou o esforzo do persoal da sanidade pública "que fan xornadas infinitas para combater demoras de días no tempo de diagnose".
"Fronte á dogma neoliberal esta emerxencia demostra de novo que o público é a garantía fundamental de resposta ante calquera desafío que teñamos como sociedade. Toca pois continuar traballando para defender o público e garantir que nesta emerxencia ninguén queda atrás", engade o de Podemos.
