Por Galicia Confidencial | Vigo | 23/03/2020 | Actualizada ás 14:00
O ex presidente da Xunta e catedrático de Economía Aplicada na Universidade da Coruña, Fernando González Laxe, vaticina unha importante crise que se fará evidente no primeiro semestre deste ano pola falta de actividade comercial e a caída da produción de importantes sectores económicos.
“A pandemia afecta tanto á oferta como á demanda. Á primeira é rachada, na medida que os peches suspenden de raíz a subministración de bens comerciais e as compras en moitos segmentos, afectando directamente as cadeas globais de valor. Iso terá consecuencias sobre a actividade económica ao longo do primeiro semestre deste ano”, apunta nun artigo divulgado polo Eixo Atlántico.
As declaracións do ex presidente galego coinciden con datos que apuntan a unha perda do 1,5% do PIB e a perda de máis de 15.000 empregos. De feito, os ERTE presentados na autonomía xa superan os 8.000, con máis de 45.000 empregados afectados.
Ademais, apunta que, ao estar confinados nos fogares, redúcese a demanda de moitos bens co que as compras se esborrallan. “E, loxicamente, as empresas se ven afectadas. Rexístrase, así mesmo, unha perda moi avultada da riqueza financeira”, engade. Por iso, ve probable que moitos fogares e empresas “queden pronto sen diñeiro” e que dependerán dos aforros líquidos. “Noutros supostos, é difícil paliar a situación ao estar moi endebedados”, engade.
González Laxe lembra o comportamento da economía durante a crise financeira do 2008 e destaca que os efectos desta nova crise serán globais “e ningún goberno por si só podería facer fronte a iso”. Con todo, aclara que as solucións responden, nun primeiro termino, máis a criterios e recomendacións nacionais que globais. E neste punto, critica o comportamento da UE. “Europa non estivo á altura das súas responsabilidades. Só o BCE, aínda que tarde, reaccionou para abordar os efectos desta pandemia coa súa bazuca económica cifrada en 750 millóns de euros”.
COMO SAÍR
E cales serán os “escudos” ante a pandemia?. Laxe di que serán de tres tipos,de índole médico-sanitario; de ámbito empresarial; e de orde social. “Hai que tomar en serio este virus porque é un gran desafío nacional e global; e, en consecuencia, en período de guerra contra un virus, os gobernos deben gastar sen contención, mobilizando os recursos necesarios para previr un desastre”, aventura.
E é contundente, “non hai que caer de novo, na trampa da austeridade e do rigor contable”. E os seus consellos pasan por frear a propagación, estirar os períodos de control da poboación ao longo dos meses, gañar tempo para descubrir unha vacina e evitar o colapso sanitario para que poidan ser atendidos os máis posibles afectados.
“Mentres tanto, a nosa misión será poder garantir, ao mesmo tempo, o peche da vida pública con que o Estado siga funcionando; que as subministracións sigan asegurados; e preservar o máximo da actividade económica como sexa posible, reducindo ao mínimo o risco das persoas”, apunta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.