A Xunta aborda cos museos a situación actual e as perspectivas de reapertura

O conselleiro de Cultura, Román Rodríguez, en compañía do director xeral de Políticas Culturais, Anxo Lorenzo, mantivo este mércores unha reunión telemática con representantes dos principais museos de Galicia, cos que analizou a situación actual e as perspectivas de reactivación da actividade.

En concreto, no encontro, estiveron representados o Museo da Catedral de Santiago de Compostela, o Museo do Pobo Galego, o Museo Nacional de Ciencia e Tecnoloxía, o Museo Marco de Vigo, o Museo Provincial de Lugo, casa-Museo Rosalía de Castro e Afundación.

Os asistentes abordaron diferentes asuntos que viraron ao redor da análise da situación actual, tras máis de seis semanas de confinamento. Neste contexto, destacáronse as cuestións que os responsables ven como precisas para poder realizar unha reapertura "ordenada e coherente dos equipamentos culturais".

A reunión contou, por invitación da Xunta, coa participación do Instituto para a Calidade Turística Española (ICTE), que está a traballar co Ministerio de Industria, Comercio e Turismo na elaboración de protocolos xerais de actuación que faciliten a implementación de medidas na desescalada destes espazos culturais.

Con iso, desde o Goberno galego expresouse o compromiso de facer achegas desde Galicia a ese marco e distribuílo entre as institucións do país para "enriquecelo". Os procedementos incluirán especificacións técnicas para os museos que permitan unha reapertura e reincorporación gradual do persoal, así como medidas de seguridade e hixiene para garantir o benestar tanto dos traballadores, como dos visitantes e residentes na contorna.

Tras a información sobre as fases de desescalada coñecida este martes, a Xunta e os representantes dos museos coinciden en que haberá que coñecer "cales serán as condicións de apertura cun terzo do aforamento", xa que estes centros non contan cun aforamento determinado como os recintos con butacas ou as bibliotecas con puntos de lectura.

REUNIÓN CO SECTOR CULTURAL

O conselleiro de Economía, Francisco Conde, e o de Cultura e Turismo, Román Rodríguez, mantiveron este mércores unha reunión por videoconferencia con membros do sector cultural para abordar as inquietudes deste ámbito como consecuencia da crise sanitaria e definir posibles medidas para paliar os seus efectos.

No transcurso deste encontro, avaliáronse as principais demandas dos sectores audiovisual, musical, de festivais e do libro, derivadas dos efectos desta crise no emprego e no mantemento do tecido empresarial. Así, abordáronse iniciativas centradas no financiamento, a inxección de liquidez ou nos expedientes de regulación de emprego temporais.

Neste marco, o titular de Cultura e Turismo explicou que o Goberno autonómico ultima un Plan de Reactivación para os sectores cultural e turístico, que conta cunha dotación de 25 millóns de euros e que "permitirá impulsar a recuperación económica e a reactivación, fomentando o emprego e mantendo o tecido empresarial".

No caso concreto da cultura, tal e como precisou Román Rodríguez, a finalidade desta folla de ruta é favorecer o consumo de produtos culturais, á vez que se incentiva ao mantemento da industria cultural galega e se impulsan medidas de fomento da creatividade e da produción cultural.

Unha das "liñas estratéxicas" deste plan pasa pola reorientación do Xacobeo 2021 como "ferramenta de estímulo da actividade económica e do consumo", co obxectivo de impulsar as industrias culturais e turísticas de Galicia.

Pola súa banda, o conselleiro de Economía, Francisco Conde, lembrou que o sector ten á súa disposición a liña de financiamento de 250 millóns de euros para achegar liquidez a pemes e autónomos, con préstamos de ata 200.000 euros que lles permitan facer fronte aos seus gastos e aos seus deberes fiscais, e facéndose a Administración autonómica cargo dos intereses.

Ademais, os traballadores afectados por expedientes de regulación temporal de emprego (Ertes) que aínda non cobrasen as súas prestacións do Goberno central, poden solicitar á Xunta os seus anticipos. Mediante un convenio acordado coas entidades financeiras, poderán recibir de forma inmediata 1.500 euros, cun tope mensual de 750 euros.