"Feijóo é o responsable do elevado nivel de contaxios e mortes en residencias polas privatizacións"
Asociación Galega para a Defensa da Sanidade Pública (Agsdp) denuncia que existe unha "relación entre as deficientes condicións previas das residencias e a incorrecta xestión realizada pola Xunta.
Por Europa Press / Redacción | SANTIAGO DE COMPOSTELA | 06/05/2020 | Actualizada ás 12:02
A Asociación Galega para a Defensa da Sanidade Pública (Agsdp) acusou ao presidente da Xunta, Alberto Núñez Feijóo, de ser o responsable do "elevado nivel de contaxios e mortalidade" nas residencias de maiores durante a crise do coronavirus debido á "privatización" destes centros.
Nun comunicado remitido este mércores, a asociación explicou que un informe do Consello de Contas de Galicia de 2018 deixaba ver "irregularidades e amiguismo" nas adxudicacións das residencias, así como "falta de controis por parte da Consellería de Política Social, escaseza de persoal, deficiencias nas instalacións e incumprimento dos protocolos de funcionamento".
Segundo Agdsp, se finalmente a pandemia non ataca coa mesma virulencia que noutras comunidades, este feito "non ten relación directa coas actuacións da Xunta" para combater o virus, senón con "as características específicas" de Galicia, como a dispersión poboacional, o menor nivel de contaminación, a escasa chegada de persoas doutros territorios, as condicións climáticas ou a menor aglomeración de persoas no transporte público.
O que si que existe, é unha "relación entre as deficientes condicións previas das residencias e a incorrecta xestión realizada pola Xunta", manifestou esta asociación que, ao mesmo tempo, tamén denunciou a falta de "transparencia e información" coa que contaron as familias e a poboación xeral sobre os casos de coronavirus nos centros de maiores.
As circunstancias que censuran levaron a esta agrupación a esixir á Xunta e á Fiscalía a "intervención inmediata das residencias" nas que se concentraron os contagios e a mortalidade e a "apertura inmediata dunha investigación para coñecer e depurar" responsabilidades.
Sobre este último asunto, a Fiscalía galega xa conta cun proceso de investigación aberto para avaliar a xestión da crise sanitaria nos centros residenciais. Trátase dun procedemento que se abriu durante as primeiras semanas da pandemia como un encargo da Fiscalía Xeral do Estado a todas as autonomías tras a aparición de varios anciáns falecidos nas instalacións dalgúns destas residencias.
RESPONDER O PARLAMENTO
A xuízo deste colectivo de defensores da sanidade pública, a privatización levou ao detrimento das condicións de traballo dos empregados e contribuíu ás "deficientes condicións das instalacións e do equipamento" destes centros.
Avogan por "reintegrar ao sistema público as residencias para garantir a saúde e a seguridade das persoas residentes" e "deseñar un cambio de modelo na atención das persoas maiores". Esixen que a Xunta "dea conta dos resultados da auditoría e das medidas adoptadas" ante o Parlamento de Galicia, os familiares, os sindicatos e a opinión pública.
