A Xunta confía en que "en dous meses" todo o persoal público estea a traballar

O vicepresidente da Xunta, Alfonso Rueda, confiou en que "en dous meses" todo o persoal público da Xunta "estea a traballar" e destacou que "moitísimos" o seguiron facendo desde as súas casas, a través das medidas de teletraballo habilitadas. "Isto non quere dicir que durante estes dous meses non se estivese traballando: estivo a traballarse. Hai que pór en valor o teletraballo e o aproveitamento das novas tecnoloxías que permitiu que moitísimos traballadores estivesen a facer o seu labor, pero desde casa", engadiu o vicepresidente, en referencia ás súas palabras.

Este luns comezaron as actuacións preliminares que permitirán a incorporación gradual dos empregados públicos ao traballo presencial, seguindo así o protocolo aprobado o pasado venres polo Consello da Xunta, e ao que se sumaron todos os sindicatos con presenza na mesa sectorial.

Durante unha visita a Pontevedresa Group, o vicepresidente da Xunta, Alfonso Rueda, explicou que o protocolo será "flexible" e seguirá a evolución da epidemia. E, "por enriba de todo", a súa "máxima prioridade" será garantir a saúde dos traballadores.

Concretamente, as actividades preliminares que comezan este luns son unha fase de preparación na que se estudarán os espazos dispoñibles e como organizalos para garantir a distancia de seguridade de dous metros.

Desta forma, identificarase o persoal con despacho propios e os espazos que cumpren as garantías. Naqueles que non se cumpran, avaliaranse reorganizacións ou dotación de elementos de separación.

Tamén se consultará co persoal a súa dispoñibilidade para teletraballar ou reorganizar as quendas, no caso de que fose necesario por motivo de afluencia de persoal. Precisamente, a extensión do teletraballo foi unha das cuestións que os sindicatos lograron introducir no plan de desescalada cuxa extensión máis aló da pandemia está previsto que se negocie.

A estimación inicial das actuacións de desescalada é dunha semana. Así pois, antes de pasar á etapa dúas o vindeiro luns 18 de maio, haberá que facer unha avaliación deste primeiro período antes de seguir o proceso, que deberá autorizar tamén o Consello da Xunta. En cada fase irase incorporando distinto persoal, de forma que a volta será graduada.

Unha vez que comece a primeira fase, incorporarase aos xefes de servizo ou postos equivalentes e aquel persoal que, polas súas funcións, non pode teletraballar, a condición de que o seu posto de traballo cumpra os dous metros de seguridade. Seguirán acudindo os traballadores dos servizos esenciais como ata o momento.

Tras polo menos dúas semanas, e se todo avanza con normalidade, a partir do 1 de xuño empezaría a segunda fase. Nela volverá o persoal que, sen estar incluído na primeira, teña espazo propio (como un despacho), así como os traballadores das oficinas nas que se cumpren os dous metros de separación entre traballadores.

A terceira fase, que podería comezar o 15 de xuño, será para todo aquel persoal que non puido incorporarse nas anteriores, e despois de realizarse os axustes necesarios nos postos de traballo para que se garanta a distancia mínima de seguridade.

A todas estas incorporacións hai que engadir a excepción daquel persoal que presente algún tipo de enfermidade ou afección que implique a súa consideración como grupo vulnerable e que serán os últimos en incorporarse.

Estas etapas son estimadas. Fíxase unha duración de dúas semanas, como mínimo, para cada unha delas, pero poderá variar no caso de que as recomendacións das autoridades sanitarias e a evolución da epidemia recomenden amplialas. De feito, está prevista a constitución dunha comisión de seguimento cos sindicatos para tratar as revisións que sexan necesarias.

DENUNCIA CIG 

Mentres arrinca a incorporación do persoal público, a CIG denunciou ante a Inspección de Traballo á Consellería, coincidindo coa incorporación aos centros educativos de máis persoal a partir deste luns para poder atender a fase final do prazo de admisión en centros escolares.

Para a central sindical, a decisión de Educación de programar a apertura dos centros escolares é "inaceptable" porque "non se negocia, como é preceptivo"; "non se trata dun documento normativo, senón dunhas recomendacións", a pesar do que se recolle que se aplicarán as indicacións que figuran nunha guía de actuación preventiva ante o coronavirus no ámbito da administración xeral, publicada no DOG do 17 de abril, e que exclúe expresamente o persoal dos centros educativos.

A CIG tamén advertiu de que "dificulta" as "posibles dispensas" de asistencia aos postos de traballo para o persoal que forme parte dun grupo vulnerable, xa que apunta a que a dirección do centro emitirá un informe para acreditar a imposibilidade de realizar a adaptación do posto de traballo ou a dotación das proteccións necesarias.

"É dilatar no tempo e burocratizar o procedemento ordinario consistente en que a persoa vulnerable faga unha solicitude ao servizo de prevención, que a exima de incorporarse ao posto de traballo", apunta este sindicado.

CIG-Ensino esixe que se dote aos centros dos equipos de protección e que a administración se encargue da compra, e non sexan os equipos directivos os encargados desta xestión. Así mesmo, reitera a petición de que non se produza a reincorporación do persoal se non existen todas as garantías e acusa á Xunta de dispensar "peor trato ao persoal docente que ao resto da administración xeral", que, con "independencia" das formas, conta cun protocolo publicado no DOG.