Por Europa Press / Redacción | Pontevedra | 19/05/2020 | Actualizada ás 19:59
O Concello de Sanxenxo (Pontevedra) planea medir este verán o nivel de ocupación das súas praias empregando drones que sobrevoarán os areais para poder informar os cidadáns "case en tempo real" a través das súas redes sociais.
Esta é unha das medidas incluídas no plan no que traballa o concello para controlar o aforamento das súas praias este verán, e no que tamén se inclúe a iniciativa de parcelar o areal de Silgar, establecendo espazos de dous metros para os usuarios.
Así mesmo, segundo informou o consistorio, este plan inclúe a medición do nivel do aforamento en praias a través de drons que sobrevoarán desde a beira os areais e que ofrecerán "case en tempo real" o estado de ocupación.
A través das redes sociais municipais emitiranse as imaxes das distintas praias de Sanxenxo e "mesmo se detallará o nivel de ocupación por porcentaxe e cores", sinalaron fontes municipais. A información será actualizada periodicamente para que o usuario coñeza o estado do areal e poida planificar a súa visita.
Os drons son un elemento polo que xa apostara o verán pasado Sanxenxo para reforzar o servizo de vixilancia e control de praias ante unha situación de salvamento no mar. Os drons, ademais, terán a posibilidade de lanzar mensaxes de recomendación se cando sobrevoa un areal detecta unha concentración excesiva de persoas nun punto.
En canto á medida de 'cita previa' proposta pola Xunta, Sanxenxo considera que "pode ser moi útil", pero destaca que o municipio traballa xa nas súas propias iniciativas de control de aforamento que se adapten máis ás súas "circunstancias".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.