O TSXG condena ao Sergas por non axilizar a operación dun paciente en lista de agarda
O alto tribunal galego aprecia "mala praxe" polo falecemento deste paciente, ao que non se axilizou a intervención tras empeorar o seu estado. Asegura que a morte do paciente puido evitarse con alta probabilidade cunha cirurxía precoz.
Por Europa Press / Redacción | Ferrol | 25/05/2020 | Actualizada ás 11:04
A Sección 1 da Sala do Contencioso-Administrativo do Tribunal Superior de Xustiza (TSXG) ratificou a condena á aseguradora do Sergas, Segurcaixa Adeslas, pola morte dun paciente de 75 anos en lista de espera para operarse dunha cardiopatía, ao apreciar "mala praxe" por non axilizarse a intervención a pesar de empeorar o seu estado.
Así consta na sentenza do TSXG, á que tivo acceso Europa Press, que desestima o recurso de apelación presentado pola aseguradora e ratifica a indemnización de 138.000 euros para a familia deste veciño de Ferrol de 75 anos, a razón de 80.000 euros para a viúva, 40.000 euros para unha das fillas e 6.000 euros para cada un dos seus outros tres fillos.
O paciente, segundo o relato de feitos, estaba desde outubro de 1997 en seguimento polo servizo de Cardioloxía do Hospital Arquitecto Marcide de Ferrol, co diagnóstico inicial de estenose e insuficiencia aórtica lixeira, hipertensión arterial e dilatación aórtica lixeira.
Tras probas de esforzo en 2001 e 2003 o paciente foi diagnosticado de cardiopatía isquémica estable e estenosis aórtica. Entón foi incluído en lista de espera nunha sesión clínica o 14 de abril de 2015 para unha cirurxía prioridade B, cun prazo de espera de entre tres e seis meses, co diagnóstico de estenose valvular aórtica severa.
Mentres o paciente estaba en lista de espera, "sufriu unha deterioración do seu estado xeral", destácase na sentenza, "con aumento da fatiga e das dores torácicas", o cal puxeron en coñecemento do Hospital Arquitecto Marcide os días 11 e 14 de setembro, "o que non fixo variar a prioridade asignada nin adiantar a data da operación", puntualiza. Finalmente, o 28 de setembro de 2015 nunha rúa de Ferrol, o septuaxenario entrou en parada cardiorrespiratoria, da que non se recuperou e faleceu.
PRIORIZAR
Para o tribunal "o fundamental para priorizar en lista de espera ten que ser a situación clínica do paciente, xa que se se demostra que este presenta maior gravidade que a apreciada na mencionada sesión clínica resulta indubidable aquela vulneración, ao non porse a disposición do paciente, de modo racional e proporcionado, os medios persoais e materiais propios da sanidade pública para afrontar a patoloxía sufrida".
Por iso, a Sala "coincide coa apreciación de mala praxe efectuada", para argumentar que non pode prosperar a apelación. Así, no seu fallo indica o TSXG que desestima o recurso de apelación presentado contra a sentenza do Xulgado do Contencioso Administrativo número 2 de Santiago de 20 de maio de 2019 e impón ao apelante as costas. Contra esta sentenza cabe recurso de casación ante a Sala do contencioso do Tribunal Supremo no prazo de 30 días desde a notificación.
"PUIDO EVITARSE"
Pola súa banda, a representación legal da familia deste paciente falecido, exercida polo bufete Castreje&Co Avogados, manifestou a Europa Press que tras o estudo do caso e o informe pericial, "concluíuse que a morte do paciente puido evitarse con alta probabilidade cunha cirurxía precoz".
"De feito, primeiro o Xulgado Contencioso 2 de Santiago e agora a Sala do TSXG sinalan que estamos ante a presenza dun caso de mala praxe médica", manifestou o avogado Cipriano Castreje, que destaca que "a sentenza é concluínte cando sinala que este tipo de enfermidade, a cirurxía da estenosis aortica severa sintomática entraña un gravísimo risco vital e constitúe un déficit asistencial o establecemento dun período de espera superior a tres meses, polo moi risco elevado de morte súbita".
