O PSdeG comprométese a impulsar unha comisión de investigación parlamentaria sobre as residencias

O PSdeG comprometeuse a impulsar durante a próxima lexislatura do Parlamento galego unha comisión de investigación sobre as residencias de maiores, que concentran case a metade de falecidos con Covid-19 en Galicia.

Así o anunciou o secretario xeral dos socialistas galegos, Gonzalo Caballero, nunha rolda de prensa telemática celebrada na mañá deste luns, xornada na que a Asociación de Persoas Afectadas na Xestión das Residencias de Maiores (ARMA) dirixiuse a todos os grupos parlamentarios das asembleas lexislativas das comunidades autónomas para que poñan en marcha unha comisión de investigación na que se estude "todo o ocorrido" nas residencias de maiores afectadas polo Covid-19.

Caballero incidiu que os familiares de usuarios de residencias falecidos na pandemia merecen "toda a empatía e transparencia", polo que se comprometeu a apoiar a creación dunha comisión parlamentaria que investigue "o que ocorreu nos últimos anos e especialmente desde marzo" nas residencias de maiores.

"As familias merecen unha explicación", incidiu o líder socialista, que apela a profundar en "que medidas se tomaron e cales non" e "que mecanismos de protección" se adoptaron para usuarios e traballadores.

"Necesitamos que o Goberno de Galicia e as administracións apoien as familias", remarcou.