AGE sae en defensa da RAG

Insiste en que o seu orzamento é "insuficiente". Ata o de agora é o único grupo que se ten posicionado sobre a polémica entre a Xunta e a Academia. BNG e PSdeG apuntan á vinculación de Ferrín con AGE.

Por Galicia Confidencial | Compostela | 10/01/2013 | Actualizada ás 12:44

Alternativa Galega de Esquerda considera "insuficiente" a achega da Xunta á Real Academia Galega e esixe estabilidade económica para a institución. Precisamente, este é o mesmo argumento utilizado o mércores polo presidente desta entidade, Xosé Luis Méndez Ferrín, logo da súa entrevista co presidente da Xunta e co conselleiro de Cultura e Educación para abordar o financiamento da RAG.

Así, a Administración autonómica achegará 520.000 euros este ano --200.000 euros máis do previsto-- á RAG para compensar a redución da transferencia estatal --de 682.000 a 341.000 euros--. Entre a achega ratificada este mércores pola Xunta e os 341.000 euros comprometidos polo Ministerio de Cultura, a entidade ten garantido polo menos uns ingresos de 861.000 euros para este ano. "Agradécese á achega pero é insuficiente", apuntou Ferrín. E é que os responsables desta institución estimaban nun millón de euros os fondos necesarios para o se perfecto funcionamento.

Estabilidade

AGE insiste tamén nos argumentos de Ferrín e esixe estabilidade para o financiamento da entidade. Esta formación pide que a RAG reciba o mesmo trato que as academias das outras nacións do Estado español e tamén un compromiso por parte do Goberno galego para o financiamento plurianual da mesma. "O obxectivo desta reclamación é garantir a continuidade das diferentes seccións da institución e dos seminarios de traballo, ademais de fixar as condicións laborais do cadro de investigadoras e investigadores e o resto do persoal", destaca a coalición.

Ademais, a formación liderada por Beiras destaca que as súas homólogas catalá, o Institut d’Estudis Catalans, e vasca, a Academia de la Lengua Vasca-Euskaltzandia, obtiveron dos seus respectivos executivos en 2012, 5.538.947 euros e 1.332.820 euros. “O que non pode ser é que a Real Academia Galega, a principal institución que vela pola lingua galega, teña que andar cada ano a mendigar o seu financiamento e dependa da vontade dos gobernos de quenda”, sinala o parlamentario Xabier Ron.

Apoio

Ata o momento, AGE é a unica formación que se ten posicionado contundentemente a favor dun maior financiamento para a RAG. Antes da entrada de AGE na Cámara galega, tanto o BNG coma o PSdeG presentaron varias iniciativas nas que lle reclamaban a Xunta a equiparación da RAG coas academias catalá e vasca e criticaron a discriminación que sufría por parte do PPdeG.

Pero agora, nin os socialistas, nin os nacionalistas teñen entrado na guerra mediatica entre a Xunta e a Academia, mesmo, logo da publicación por parte do ABC de que Ferrín ten a súa filla e ao compañeiro desta empregados nesta institución e que se despraza de Vigo á Coruña nun Audio 8. "Preguntadelle aos de AGE que se pronuncien sobre iso. Nós non imos a entrar a valorar estas cuestións do presidente dunha institicuón que forma parte desa coalición", apuntan fontes nacionalistas consultadas. "Está claro que hai discriminación coa RAG pero hai xeitos e xeitos de manifestalo. E tamén comportamentos, tanto persoais coma políticos. Nós non estamos pola politización da Academia", apunta outro deputado consultado do PSdeG.

Noticias relacionadas

4 Un canso

E dalle co da filla. Coma se ve que estades facendo unha campaña contra a RAG e, sobre todo, contra Ferrín e contra AGE. Que pasa, agora estades traballando para a seita?.

3 Un canso

E dalle co da filla. Coma se ve que estades facendo unha campaña contra a RAG e, sobre todo, contra Ferrín e contra AGE. Que pasa, agora estades traballando para a seita?.

2 Nemigo

non é posible baixarlles o sueldo aso familiares dos académicos? e tamén pagar menos de "dietas"?

1 Adeus

Que vengonza AGE. Que vengonza Beiras, a quen tanto respeto!!. Denuncia a falta de ética de Ferrín ou agora mesmo acabas de perder o meu apoio. O final sodes todos iguais. Só respondedes polos vosos amigos, o fagan ben ou mal. Mentras tanto eu, licenciada en filoloxía, no paro. Claro, eu non teño un papá metido en política. Non merecedes este pobo que cre en vosoutros e a primeira de cambio, o vendedes.....

1 Galego

Ala aquí andan de novo os pesados da UPG, coas tácticas da vella garda... A xente respecta a RAG, e a lingua, o que xa non tenho tan claro é que respecten ao BNG. Ides caminho da desaparición, e seguides igual. Alá vós!!

2 Un que non é parvo

A información de GC é tendenciosa, por non chamala sinxelamente falsa....Porque oculta claramente quén deu a cara no debate orzamentario que houbo ( o do estado ) e no que o BNG ( non así IU, parte de AGE ) presentou propostas para aumentar as achegas á RAG http://www.eldiario.es/politica/BNG... Un pouquiño de seriedade nas informacións: unha cousa son as benquerencias deste medio a AGE e outra diferente é a mentira....

3 Un que si que non é parvo

Para un que di que non é parvo: "Antes da entrada de AGE na Cámara galega, tanto o BNG coma o PSdeG presentaron varias iniciativas...". Onde está a mentira?. O enlace que envias é de comezos de outubro do pasado ano. AGE entrou na Cámara en decembro. Onde está a falsidade?. Non vexas bruxas onde non as hai

4 Un que non é parvo

Sigo dicindo que a información é tendenciosa. O titular tamén podía poñer " AGE únese ás demandas feitas tradicionalmente polo BNG na defensa do financiamento á RAG" ou cousa similar.Pero, está claro, o titular que se procuraba era o que se puxo...Os compromisos mídense na prática, non nas declaracións; e que eu saiba, aínda non se debateron no Parlamento Galego as emendas dos grupos. Onde sí se debateron, foi no Congreso, e aí non consta que IU (como parte de AGE, que xa era naquel momento ) presentase proposta algunha ao respecto. Por certo, non miro bruxas, senón papeis, propostas e compromisos por unha parte; e moitas verdades a medias por outra.....