"Aprender galego para ser máis de aquí"

Hai canarios, cubanos, mexicanos, uruguaios, venezolanos, rumanos, cataláns. Todos teñen en común que aprenden galego. Viven en Carballo e entende que falando a lingua do país poden integrarse máis na nosa cultura e ensinarlle aos fillos. Outros, coma un chileno-estadonidense, aprende galego para ensinar a palabra de Deus "polas aldeas".

Todos eles participan no Obradoiro de integración lingüística e cultural organizado polo Servizo de Normalización Lingüística do Concello de Carballo e decidiron colgar os seus sentimentos no vídeo 'Nov@s galeg@s que queren falar galego'.

"Para ensinarlle á miña filla"

Neste pequeno vídeo, pensado para difundir nas redes sociais, algunhas das persoas participantes nese obradoiro sinalan de maneira moi breve algunhas das súas motivacións para aprenderen galego, como por exemplo “para ser máis de aquí”, “para entender as letras dos grupos de música galegos”, “por motivos laborais” ou “para ensinarlle á miña filla a falar a lingua de aquí”.

No obradoiro organizado polo Servizo de Normalización Lingüística do Concello de Carballo, que tivo lugar entre o 15 de novembro e o 20 de decembro de 2012, desenvolvéronse diversas actividades para coñecer a lingua, a música, a literatura, a prensa, a xeografía, etc., galegas, e para facilitar o acceso ao mundo laboral, e a integración na sociedade galega e carballesa. Esta actividade vense realizando desde o ano 2005.

Aínda que no vídeo interveñen 13 persoas, no obradoiro participaron 30, chegadas desde Brasil, Chile, Colombia, Cuba, México, Nixeria, Paraguai, República Checa, República Dominicana, Romanía, Senegal, Uruguai, Venezuela e de diversos puntos do estado español.