Alcoa: A ministra Maroto insta á Xunta a exercer as súas competencias en Industria no canto de "buscar culpables"

Explica que a "inestabilidade política" e "unhas cantas eleccións" imposibilitaron a aprobación do estatuto electrointensivo.

Por Europa Press / Redacción | Madrid | 02/06/2020 | Actualizada ás 19:37

Comparte esta noticia

A ministra de Industria, Comercio e Turismo, Reyes Maroto, instou á Xunta de Galicia a que exerza as súas competencias en materia industrial no canto de "buscar culpables" ante un posible peche de Alcoa en San Cibrao (Lugo) e pediulle lealdade institucional para manter o emprego industrial en Galicia.

A ministra de Industria, Comercio e Turismo, Reyes Maroto
A ministra de Industria, Comercio e Turismo, Reyes Maroto | Fonte: Eduardo Parra - Europa Press.

Así o sinalou a ministra na súa intervención no pleno do Senado deste martes, no que fixo un chamamento a todas as administracións públicas, axentes sociais e forzas políticas para traballar xuntos e evitar os despedimentos anunciados pola multinacional norteamericana produtora de aluminio.

Na súa resposta ao senador do PP José Manuel Barreiro, quen atacou ao Executivo por non aprobar un marco lexislativo que dea estabilidade ao prezo da enerxía —un dos principais problemas que alega Alcoa—, a ministra lembroulle que a última lexislación respecto deste asunto foi aprobada por un Goberno do seu partido político.

Barreiro, con todo, insistiu en que o Goberno estivo enganando aos traballadores durante os dous últimos anos, despois de que, en outubro de 2018, prometese a aprobación dun estatuto electrointensivo que tentase mitigar o problema do prezo da enerxía e que aínda siga sen aprobarse.

Maroto, pola súa banda, dixo que a "inestabilidade política" e "unhas cantas eleccións" imposibilitarían a aprobación do estatuto, xunto coa situación creada pola pandemia de Covid-19, aínda que puxo en valor o paquete de medidas aprobado polo Goberno de cara á industria, como o reforzo das axudas ao CO2, o Plan Reindus ou un investimento de 114 millóns de euros na rexión.

CRUZAMENTO DE ACUSACIÓNS

Pola contra, o senador do PP lanzoulle unha pregunta: Que lle fixemos os galegos a este Goberno?, culpando á ministra de "non facer nada" para solucionar este problema, que considera que é que o 40% do custo da fábrica corresponde a un único elemento, o custo da enerxía.

Na súa resposta, foi Maroto a que acusou o presidente da Xunta, Alberto Núñez Feijóo, de non facer nada e de non interesarlle a política industrial ao seu partido, que "se cargou o Ministerio de Industria", pero si é algo sobre o que a comunidade ten competencias.

Por iso, instouno a que exerza as súas competencias industriais e a que non abandone a política industrial, xa que "ten consecuencias" e que deixe de buscar culpables e, no seu lugar, busque solucións, xa que afirma que a Xunta tamén coñece os problemas e a "difícil situación" de Alcoa, tras a caída da demanda e do prezo do aluminio.

A ministra volveu lembrar que a compañía recibiu axudas por valor de máis de 37 millóns de euros nos dous últimos anos, "co esforzo dos españois", e apelou á "unidade de acción e á lealdade institucional" de todas as administracións para manter o emprego.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta