G. Caballero, sobre Feijóo: "Aparenta que é un caniche, pero dentro leva un dóberman que mordeu a sanidade"

O secretario xeral do PSdeG, Gonzalo Caballero, asegurou que "os maiores problemas" en Galicia durante os peores momentos da pandemia xurdiron naqueles sectores "onde Feijóo tiña responsabilidades": as residencias de maiores e a sanidade.

Nunha entrevista na Cadena Ser, recollida por Europa Press, o líder socialista acusou este domingo ao presidente da Xunta de fallar nesas dúas cuestións. "Xa o coñecemos. Aquí, cando falamos de sanidade pública, sabemos que en once anos de goberno de Feijóo se perderon mil camas hospitalarias; que fixo recortes por 2.000 millóns na sanidade pública, que precarizou emprego e que reduciu servizos nos hospitais comarcais".

Neste sentido criticou que mentres o titular do Goberno galego foi "omnipresente" nos medios públicos da Comunidade non tivo que "tomar decisións importantes en materia económica nin social". Ademais, lembrou o "amplísimo risco" ao que Feijóo quixo someter aos galegos cando o 3 de maio dixo que "había que levantar o estado de alarma"

Respecto diso, tamén engadiu que "tenta expor unha gran xestión cando sabemos que non houbo anticipación. Decretou o estado de emerxencia sanitaria despois de que Pedro Sánchez anunciase por televisión o 13 de marzo que se ía a decretar o estado de alarma. Feijóo saíu tres horas despois".

Para o candidato do PSdeG, este feito constata que foi "responsable de todo o que sucedeu nas residencias de maiores, onde morreron a metade dos falecidos pola COVID-19 en Galicia". "É unha irresponsabilidade máxima que tente colocarse esas medallas". "Sabemos o que pasou", puntualizou.

FEIJÓO LEVA DENTRO "UN DÓBERMAN"

Por outra banda, Caballero tamén criticou que Feijóo tente "aparentar que é un caniche" cando realmente "dentro leva un dóberman que mordeu a sanidade, os servizos público e o estado de benestar".

En todo caso, o socialista galego recoñeceu que "de cara ao conxunto de España" consegue "trasladar esa imaxe de moderado" aínda que el asegura que o presidente galego é "PP en vea, PP puro e duro, o de Casado, o de Ayuso, o de Álvarez de Toledo". Este tipo de afirmacións exemplificounas ao dicir que o titular galego tivo unha "actitude crítica" con Pedro Sánchez na "campaña de acoso e derriba da dereita contra o goberno de progreso" que alcanzou "un nivel máximo de deslealdade e irresponsabilidade".

RESIDENCIAS DE  MAIORES

Para o candidato socialista, un dos aspectos que fallaron máis claramente durante a pandemia ten que ver coas residencias de maiores. Caballero asegura que "o sistema fallou" porque había un modelo de atención "con compoñente público" e cando Feijóo chegou á Xunta "desfíxose das participacións, colocounas nas caixas (de aforros) e das caixas foron a unhas determinadas empresas que acabaron montando un imperio de xeriátricos con fins económicos e lucrativos".

Neste sentido, tamén precisou que o Partido Popualar "ten moito que ver niso, porque nesas empresas hai un paraugas de protección por parte do goberno da Xunta".

O secretario xeral do PSdeG, Gonzalo Caballero, na sede da formación. PSDEG