Arranca o puntogal.org
O Auditorio de Galicia en Santiago de Compostela acolle o vindeiro sábado, día 10 de xaneiro, a Asemblea Constituínte da Asociación PuntoGal.
Por Galicia Confidencial | Galicia | 02/06/2006 | Actualizada ás 16:30
A Promotora do PuntoGal, unha vez rematados os traballos previos necesarios para a posta en marcha da asociación, acordou convocar a asemblea constituínte o 10 de xuño, de tal maneira que nos meses de verán se poidan desenvolver as accións máis urxentes con vistas a presentar diante da ICANN a candidatura do dominio .gal.
Esta entidade convoca a xuntanza en primeira convocatoria ás 10.30 horas, ás 11.00 horas en segunda. Na orde do día figuran como puntos máis importantes a aprobación dos Estatutos, a elección da Xunta Directiva e a presentación das súas propostas de traballo para os vindeiros meses.
A convocatoria será de carácter aberto. As entidades convocantes consideran que a nova entidade debe ser plural e amplamente representativa das sensibilidades do país. Unha vez máis, é preciso lembrar que a única maneira de conseguir o obxectivo da asociación será coa suma de vontades e esforzos.
As persoas que participen na asemblea deberán facelo en representación de entidades legalmente constituídas e terán que presentar no acceso da sala a carta de adhesión asinada polo órgano directivo correspondente. A carta pode descargarse en www.puntogal.org/cartaadhesion.
A presentación de enmendas ós estatutos, que se poden consultar na páxina www.puntogal.org/estatutos, finaliza o día 8 de xuño. Enviaranse ó enderezo electrónico prensa@puntogal.org ou á Rúa Tabernas, 11, da Coruña co encabezamento "Asemblea PuntoGal".
A Xunta Directiva estará composta por presidencia, vicepresidencia, secretaría, tesourería e un mínimo de tres vogais. As propostas de candidaturas remitiranse ó enderezo anteriormente citado.
A Promotora PuntoGal puxo xa en funcionamento a web oficial de iniciativa, que se pode consultar na súa primeira versión en www.puntogal.org. Na páxina están dispoñibles a proposta de estatutos, a carta de adhesión, así como unha explicación xeral da iniciativa. A web servirá como vía de comunicación das iniciativas e traballos en curso, ademais de ser o lugar onde se colocarán as noticias que se vaian producindo".
