A compra de máscaras pode multiplicar por catro o gasto en produtos farmacéuticos
As familias españolas gastan de media entre 220 e 250 euros en produtos farmacéuticos ao ano. Con todo, coa obrigatoriedade da máscara podería chegar aos 900 euros.
Por Galicia Confidencial | SANTIAGO DE COMPOSTELA | 10/08/2020 | Actualizada ás 21:30
As familias españolas veñen gastando en produtos farmacéuticos unha media de entre 220€ e 250€ nos últimos anos. Estas cantidades poderían multiplicarse por catro pola obrigatoriedade de usar máscara na maioría das comunidades autónomas e a necesidade de protexerse fronte ao coronavirus.
Segundo a OCU, o gasto en máscaras dunha familia de 4 membros que utilizan polo menos unha máscara diaria cada un (120 unidades ao mes), alcanzaría os 115€ mensuais se as adquiren ao prezo máximo fixado de 96 céntimos.
Asumindo a posibilidade de que os españois se vexan obrigados a usar máscara durante o resto de 2020, o gasto só en máscaras podería ascender a case 700€. Se se engade o gasto habitual en produtos farmacéuticos, o total deste ano podería quedar en algo máis de 900€ por familia.
“Evidentemente estas cifras dependen moito do tipo de familia, da súa composición, do tipo de máscaras que compren, de que prezo son as máscaras e de onde residan, pois o gasto medio en farmacia varía bastante dunha provincia a outra”, explica Agustí Amorós, director de desenvolvemento de negocio da consultora AIS Group, especialista no cálculo de indicadores sociodemográficos e económicos.
A Coruña é a segunda provincia que presenta un gasto anual máis elevado en produtos farmacéuticos cun total de 303€, Lugo é a terceira cun orzamento que queda nos 293€. Completan a lista Madrid e Barcelona.
