Novo positivo por COVID doutro brigadista da cuadrilla municipal de Cualedro
"O propio brigadista que deu positivo foi o que nos dixo que estivera en contacto cun contaxiado, e en canto nolo dixo mandamos confinar aos compañeiros", explica o alcalde da localidade.
Por Europa Press / Redacción | SANTIAGO DE COMPOSTELA | 04/09/2020 | Actualizada ás 19:53
Outro brigadista do dispositivo contra incendios forestais de Galicia deu positivo en covid-19, en concreto un profesional da cuadrilla municipal do concello ourensán de Cualedro.
Así o confirma en declaracións o alcalde, Luciano Rivero, quen explica que este caso positivo obrigou a pór en corentena ao catro compañeiros do traballador.
"O propio brigadista que deu positivo foi o que nos dixo que estivera en contacto cun contaxiado, e en canto nolo dixo mandamos confinar aos compañeiros", explica.
Pendente do resultado das probas, este municipio queda agora cunha única brigada municipal operativa. "Son circunstancias moi especiais, e ademais non hai xente, aínda que quixésemos cubrir (aos confinados), presentóusenos a xente xusta para montar as dúas brigadas e non hai capataces", apunta o alcalde.
Así as cousas, entende que, en caso de declararse un lume no seu concello, serán brigadas dos municipios limítrofes ou do servizo da Xunta as que reforzarán o servizo.
E é que durante este venres existe risco "extremo" de incendios forestais en Galicia, segundo advirte a Aemet, nunha xornada con altas temperaturas sobre todo na provincia ourensá.
DOUS NEGATIVOS NA LOURENZÁ (LUGO)
Nas últimas xornadas, a Xunta confirmou positivos en covid-19 en brigadas do seu servizo da Cañiza (Pontevedra), San Xoán de Río (Ourense) e A Lourenzá (Lugo).
Neste último municipio, ademais do positivo había outro cinco brigadistas en corentena e, polo momento, as probas deron resultado negativo para dous deles, segundo apuntan a Europa Press fontes da Consellería de Medio Rural.
