"Decántome polo ben público e non por satisfaccións privadas"
Xesús Alonso Montero di que a súa lista á RAG é para "mellorar" a xestión da Executiva anterior e aposta por unha candidatura consensuada coa de González pero na que a Presidencia "é irrenunciable".
Por Galicia Confidencial | A Coruña | 01/04/2013 | Actualizada ás 15:08
"Mellorar a xestión" da anterior Executiva presidida por Xosé Luís Méndez Ferrín é un dos obxectivos do escritor Xesús Alonso Montero que este luns formalizou a súa candidatura para presidir a Real Academia Galega (RAG). Con todo, o académico insistiu en que o seu obxectivo é chegar a unha lista de conseno co seu rival, o actual tesoureiro en funcións e tamén académico, Manuel González.
Montero explicou que tomou a decisión de presentarse tras escoitar "a voz do ben público", en alusión á outros académicos. "Decanteime polo ben público e non pola satisfacción privada", sinalou. En todo caso, quixo aclarar que as loitas internas na Academia, que desembocaron na dimisión de Méndez Ferrín, "non teñen nada que ver co diñeiro".
"Os académicos non temos un salario complementario. O que imos ter é moito traballo", dixo en referencia a se sae gañador a súa lista. Se non é así, indicou que el e o seu equipo estarán "ao servizo non de Manuel González, senón da Academia", institución da que subliñou a súa función para "codificar" o idioma e para preservar "o tesouro bibliográfico" do que dispón.
"Non é a nosa culpa"
Montero estivo acompañado, entre outros académicos, por Rosario Álvarez, -unha das dúas persoas que Montero confirmou xa que formará parte do seu equipo directivo, xunto ao teólogo Andrés Torres Queiruga. E insistiu en que se non existe unha candidatura de consenso "non é pola nosa culpa".
Respecto diso, incidiu en que a candidatura de Manuel González "presentouse pronto e a posibilidade de facer un consenso amplo foi xa imposible", recalcou. A pesar diso, considerou factible establecer "un consenso parcial" coa inclusión de dous membros da outra candidatura no seu equipo directivo, aínda que precisou que a presidencia "non é negociable".
Sobre a ausencia dunha candidatura única, manifestou que, tras a dimisión do expresidente Xosé Luís Méndez Ferrín, el e outros académicos que o apoian -entre eles os catedráticos da Universidade de Santiago de Compostela (USC) Margarita Ledo e Henrique Monteagudo- esperaban que houbese unha reunión dos académicos para encarar "a nova etapa". Con todo, insistiu en que o anuncio de Manuel González de presentar a súa candidatura fixo "imposible" un acordo.
Fusión
Montero descartou a fusión da RAG con outros organismos. "Que haxa coordinación, non implica que vaia a haber unha especie de fusión", sentenciou Montero, quen defendeu tamén a "independencia" desta institución fronte a outras institucións.
En canto á data do pleno no que se elixirá ao novo presidente da RAG, Montero lembrou que esta cuestión corresponde ao equipo directivo en funcións, pero non descartou que poida celebrarse "antes de oito ou dez días".
