O director da DGT insiste en reducir a velocidade a 30k/h nas cidades para ter unha mobilidade "segura"
Avoga por lograr acordos para a redistribución do espazo viario e non quedar "atrapados na conxestión e a contaminación".
Por Europa Press / Redacción | A CORUÑA | 21/09/2020 | Actualizada ás 14:26
O director xeral da Dirección Xeral de Tráfico (DGT), Pere Navarro, fixou como reto das cidades avanzar cara a unha mobilidade "sustentable e segura", tras un 2019 no que os falecidos en vías urbanas aumentaron un seis por cento mentres que nas interurbanas diminuíron neste mesma porcentaxe respecto de 2018.
Así o manifestou coincidindo coa visita que realizou á cidade da Coruña para coñecer as iniciativas que está a impulsar o consistorio en materia de mobilidade. Tanto nun acto coa alcaldesa da Coruña, Inés Rey, como na súa visita á Xefatura de Tráfico, xunto á subdelegada do Goberno, Pilar López-Riobóo, asegurou que se está "na boa dirección", pero recalcou que se debe seguir traballando co obxectivo de que "non haxa mortos".
"Acougar o tráfico é o gran proxecto da DGT para reducir os accidentes nas cidades", indicou sobre medidas como reducir o tráfico a 30 quilómetros por hora. Para todo iso, avogou por implicar á cidadanía e lograr "acordos" na redistribución do espazo viario. Así, mostrouse convencido de que o uso da bicicleta e, sobre todo, fomentar os desprazamentos a pé facilitarán a "transformación" das cidades neste sentido.
Ao fío disto, e na Semana Europea da Mobilidade, destacou que exista un ministerio nesta área e que se abriu o debate para a "estratexia nacional de mobilidade". "E estase traballando na primeira lei de mobilidade", citou tamén como exemplos.
