O gasto medio dos galegos nas vacacións de verán cae un 41%
Segundo o Observatorio Cetele, o 42% dos enquisados declarou non ter intención de viaxar no verán por medo a un posible contaxio.
Por Europa Press / Redacción | SANTIAGO DE COMPOSTELA | 23/09/2020 | Actualizada ás 10:39
O gasto medio dos galegos nas vacacións de verán foi de 517 euros, fronte aos 869 euros do ano pasado, unha caída do 41 por cento, en pleno impacto da pandemia de coronavirus, segundo o estudo do Observatorio Cetelem Estacional, dado a coñecer este mércores.
Segundo o estudo, que analiza o comportamento dos consumidores de Galicia respecto ao gasto nas vacacións deste verán, realizado pola unidade de estudos da marca comercial de BNP Paribas Persoal Finance, o 85% dos galegos enquisados recoñece gastar menos que en 2019, o que significa 63 puntos porcentuais por encima do declarado en 2019.
A evolución da pandemia provocou que, mentres que o pasado mes de xuño o 20% dos enquisados declarou non ter intención de viaxar no verán por medo a un posible contaxio, finalmente esa porcentaxe incrementouse ata o 42%.
O Observatorio Cetelem, realizado a partir de mil enquisas en liña entre poboación maior de 18 anos, conclúe que o 16% dos enquisados declarou non facer unha viaxe este verán debido ás restricións en hoteis e praias, catro puntos por baixo do manifestado en xuño.
