Afástase a moción de censura en Ourense logo do apoio do novo edil a Jácome
O rexedor conta agora co apoio de dous concelleiros. A única solución de quitalo da alcaldía sería cunha moción de censura entre PSdeG e PPdeG.
Por Europa Press / Redacción | OURENSE | 23/09/2020 | Actualizada ás 13:24
O edil de Democracia Ourensá (DO) que tomou posesión durante o pleno deste mércores --tras a dimisión de Mario González--, Telmo Ucha, afirmou que, "con absoluta lealdade ao alcalde", a Gonzalo Pérez Jácome (DO), porase "á súa disposición" para desbloquear a actual situación na cidade.
Así o trasladou na mañá deste mércores a través dunha nota de prensa, na que aclarou que tomou esta decisión, "profundamente meditada, sen entrar en debates sobre cuestións de partido". De feito, a súa posición será a de formar parte das xuntas de goberno locais sen aínda confirmar se se sumará ademais á lista de DO ou pasará ao non adscritos --conta desde hoxe con cinco días hábiles para decidilo--.
Polo momento, como terceiro concelleiro nas xuntas, estas xa quedarían desbloqueadas, posto que, ata agora, unicamente o propio Jácome e o seu exclusivo afín, o recentemente nomeado tenente de alcalde, Armando Ojea, estaban en disposición de integralas, sendo necesario un mínimo de tres edís.
A postura de Ucha afasta, así, a posibilidade dunha moción de censura articulada entre o PPdeG, os díscolos de DO e o seu apoio como non adscrito, clave para conformar unha maioría ao non integrar o goberno anteriormente durante esta lexislatura --o seu voto si tería valor, non así o dos concelleiros díscolos co rexedor--.
Subsiste por tanto unha soa opción para poder apartar a Jácome da Alcaldía: unha moción de censura orquestrada entre o PSOE --con 9 edís-- e o PP --con 7--, unha opción que o presidente do PP provincial, Manuel Baltar, afirmou que estaba "sobre a mesa" e que é "perfectamente viable". Os socialistas sempre supeditaron o asunto a unha determinación dos órganos do partido.
"A miña decisión está baseada unicamente no principio de respecto á cidadanía de Ourense", abundou o novo concelleiro, á vez que destacou que, "nesta situación, na que moitas persoas están a sufrir as consecuencias da COVID-19", os que teñen que "asumir responsabilidades políticas" deben "responderlle" aos veciños "con total dedicación e traballo".
Deste xeito, Ucha explicou que pasará a "asumir aquelas responsabilidades" para "servir da mellor maneira á cidadanía", a súa "única preocupación diaria dentro da política local", finalizou.
