A baixada dun encoro no Eume deixa ao descuberto un vertedoiro en pleno parque natural

A baixada do nivel da auga contida no encoro da Capela vén de deixar ao descuberto as "vergoñas" de Endesa. Esa é a denuncia que realiza a plataforma ADEGA logo de que, nas últimas xornadas, comezaran a ser apreciables as "pegadas" no río Eume logo de "case medio século" empregando o encoro como un "vertedoiro".

En concreto, dende a asociación ecoloxista destacan que o baixo nivel das augas permite comprobar a presenza de lamas e refugallos mineiros "con alto potencial contaminante" deitados no vaso. Hai "lama de rechamantes cores oxidadas, fragmentos de lignito, restos de cinsas e outros refugallos mineiros e industriais", sosteñen.

Dende a plataforma apuntan directamente á empresa Endesa como responsable destes verquidos. Segundo destacan, foi por 1953 cando unha concesión do goberno franquista permitiu á socieade a explotación dun fragmento do río Eume. O espazo, que comprendía 3'4 kilómetros, foi secado na súa práctica totalidade ata que, en 2010, unha intervención da Fiscalía obrigou á empresa a "presentar un proxecto para liberar o debido caudal ecolóxico", explican.

"VERTEDURAS" DA MINA

O dano, porén, estaba feito. O que hoxe se aprecia no chan do encoro é o resultado "das verteduras da mina e dos arrastres e escorrentías arredor do enorme oco mineiro", que segundo sosteñen dende a plataforma verde hoxe se atopa convertido nunha enorme balsa "de máis de 800 hectáreas".

Fronte a este dano, que segundo os ecoloxistas continuou máis alá de 2010 nas sucesivas actuacións da empresa, a solución pasa por "declarar caduca a concesión e obrigar a restaurar o río" para poñer fin á "aldraxe" da zona. "Endesa xestionou esta explotación como o seu cortijo particular durante décadas, coa comenencia das administracións. Incumprimentos reiterados da Lei de Augas, de Pesca Fluvial, dos caudais ecolóxicos...", sinalan.