Besteiro di de Feijóo que "non dá unha a dereitas" logo das críticas do líder 'popular' á xestión do apagamento
O secretario xeral do PSdeG lembrou que o presidente da Xunta puxo en valor a cooperación e apoio do Goberno de España, nun "marco de absoluta coordinación, respecto e colaboración", que "é o que os cidadáns queren escoitar"
Por Europa Press / Redacción | SANTIAGO DE COMPOSTELA | 30/04/2025 | Actualizada ás 15:39
O secretario xeral do PSdeG, José Ramón Gómez Besteiro, cualificou como "inexplicable" a crítica que o presidente do PP, Alberto Núñez Feijóo, fixo sobre a xestión do apagamento eléctrico por parte do Goberno, e apuntou que "non dá unha a dereitas".
En declaracións aos medios ante o acceso á fábrica de Sargadelos en Cervo, Gómez Besteiro, censurou a posición de Feijóo, facendo esas críticas desde Valencia, onde apoiou o pacto de goberno entre o PP e Vox, e "onde non foi capaz" de criticar ao presidente Carlos Mazón, pese ao "caos" na xestión da DANA.
Nese sentido, censurou o apoio do líder do PP ao presidente da Generalitat Valenciana mentres critica a xestión da crise enerxética, "que en Galicia está a ser defendida polo propio Alfonso Rueda", e iso "sen que se lle caia a cara de vergoña".
Gómez Besteiro lembrou que o presidente da Xunta puxo en valor a cooperación e apoio do Goberno de España, nun "marco de absoluta coordinación, respecto e colaboración", que "é o que os cidadáns queren escoitar".
En momentos de crises e de problemas, subliñou o líder dos socialistas galegos, "o que hai que facer é colaborar e axudar, e non críticas", e destacou a normalidade coa que o Goberno central asumiu a xestión cando a Xunta solicitou declarar o nivel 3 de emerxencias.
