A Xunta terá que sumar 21.000 ordenadores portátiles máis para o plan de semipresencialidade en educación

O plan de continxencia para os casos nos que sexa necesario optar polo ensino non presencial ou semi presencial na educación galega contempla un reforzo da formación para os docentes e tamén o préstamo de computadores portátiles aos alumnos en situación máis desfavorecida.

Así o concretou o presidente galego, Alberto Núñez Feijóo, quen remarcou que, en total, a Xunta porá a disposición do alumnado un total de 55.000 portátiles. Deles, 34.000 xa están a disposición dos centros, pero sumaranse outros 17.000 mediante un convenio co Goberno central e a Xunta, ademais, adquiriu outros 4.000, que se irán entregando conforme cheguen.

No caso destes equipos, Feijóo indicou que levarán "o extra da wifi incorporada".

O mandatario autonómico lembrou que este plan de continxencia pon o foco naqueles institutos de Bacharelato e FP que, no ámbito urbano, non teñen capacidade de desdobrar as aulas e axustarse ás novas normas derivadas da pandemia. Terá que formularse a solicitude e estar ratificada pola Inspección Educativa.

Pero o plan tamén será de aplicación no resto de etapas inferiores da educación, como Infantil, Primaria e ESO, naqueles casos de alumnos illados como positivos en covid-19 ou de compañeiros que, aínda sendo negativos, teñan que manter unha corentena por ser contactos estreitos.

Feijóo preside o Consello da Xunta.. Xunta de Galicia | Fonte: Europa Press