O Concello da Coruña e a familia do coruñés asasinado en Filipinas estudan a vía xudicial para esclarecer feitos

A alcaldesa da Coruña, Inés Rey, comprometeuse coa familia do coruñés Diego Bello a consultar con avogados especialistas en dereitos humanos a posibilidade de presentar unha denuncia en Filipinas para que se esclareza "o asasinato" do empresario no país asiático.

Fontes do Concello explican que, tras unha reunión da rexedora cos pais do empresario, Rey tamén garantiu á familia que falará coa ministra de Asuntos Exteriores, Arancha González Laya, para que se manteña a vía diplomática para aclarar o ocorrido fai xa nove meses.

"Sentimósnos desanimados porque o tempo pasa e non hai nada que nos achegue á xustiza para Diego", apuntaron representantes da familia de Bello, que entregaron a Rey unha copia do informe da Comisión de Dereitos Humanos de Filipinas de agosto que cualifica de "execución xudicial" a morte do coruñés.

O documento, afirman, "sinala que a Policía disparou a matar nunha clara violación dos dereitos humanos" e engaden que os expertos negan calquera vinculación do coruñés co tráfico de drogas. A familia agradeceu á alcaldesa a declaración institucional que aprobou toda a corporación para que se "faga xustiza".