Por Europa Press / Redacción | SANTIAGO DE COMPOSTELA | 01/10/2020 | Actualizada ás 15:20
O sistema educativo galego segue sumando novos casos de COVID-19. A incidencia da pandemia alcanza xa os 350 positivos en activo nas escolas e gardarías do territorio, unha cifra que a pesar de supor uns nove contaxios a maiores respecto deste xoves implica un incremento de polo menos 130 afectados en tan só unha semana.
A pesar de todo, as autoridades sanitarias manteñen unhas 37 aulas pechadas debido aos positivos rexistrados nos centros, tras reabrirse oito respecto ao xoves. A maioría das unidades clausuradas sitúanse en escolas da área de influencia de Vigo, unhas 16, aínda que Ourense xa se consolidou como a zona con maior incidencia de casos por COVID-19.
Dos 350 casos activos na actualidade, 82 danse en centros da área ourensá, que tamén conta con algúns dos centros con maior número de positivos. Entre eles, o CPR Divina Pastora de O Barco, con cinco contaxios, e o CEIP As Mercedes de Ourense, que cos seus casos (nove deles menores do mesma aula de primaria) representa o brote máis importante desde o arranque do curso escolar.
A Anpa Pía da Casca trasladaba este xoves a súa preocupación pola situación no centro, con dúas clases afectadas por estes positivos, e denunciaba a falta de eficacia do protocolo de adaptación, da coordinación e información ás familias e do cumprimento das medidas de seguridade ante a pandemia.
O CPR A Grande Obra da Tocha, na Coruña, conta pola súa banda cun seis positivos, pero ningunha unidade pechada, mentres que o Mosteiro de Meis suma xa ata cinco contagios, que obrigaron a pechar polo menos unha aula do centro, entre outros casos.
NOVOS CENTROS CON POSITIVOS
As autoridades sanitarias detectaron, ademais, casos de COVID en novos centros da Coruña, Ferrol, Santiago, O Barco, Ourense, Ramirás, Cambados, Meis, Vilagarcía de Arousa e Vigo.
En concreto, un novo positivo no IES Plurilingüe Rafael Dieste da cidade herculina, o CIFP Rodolfo Ucha Piñeiro, de Ferrol e o IES Pontepedriña e Eduardo Pondal, este último con dous casos.
En Ourense, detectáronse contaxios no IES Laura Olmo de O Barco, en CIFP A Faruxa da cidade das Burgas e o Rogelio García Yáñez, de Ramirás, e en Cambados uns dous positivos no CEIP San Tomé. O resto de centros son o CEIP de Armenteira en Meis, o Rosalía de Castro en Vilagarcía, e os CPR Plurilingüe Apostol Santiago e Miralba, en Vigo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.