Unións Agrarias resalta que a vendima "foi mellor do que se prevía" malia unha "caída importante" na produción

Unións Agrarias (UU.AA.) considera que a vendima deste ano mellorou as previsións a pesar de rexistrar "unha caída importante" na produción con catro millóns de quilos de uva vendidos menos que o ano pasado. Así o expuxo o secretario xeral do sindicato, Roberto García, ao facer balance da campaña da vendima desenvolvida nas últimas semanas en Galicia.

"Foi unha mellor vendima da que se prevía en xuño, a pesar de todo, os viticultores van ter menos diñeiro que o ano pasado", sinalou García, que cifrou en 64 millóns de quilos de uvas a cantidade recollida este ano, catro menos que na campaña de 2019.

Unha caída na produción que se explica, segundo o responsable de Unións, polo "modelo" de viticultor das denominacións de orixe de Ribeiro, Ribeira Sacra e Valdeorras, que concentran o descenso fronte a outras áreas como as Rías Baixas onde hai unha maior profesionalización e nas que o volume de recollida incrementouse.

Neste sentido, UU.AA. advirte da tendencia nesas zonas da provincia de Ourense onde se produce unha "caída significativa" da produción que cren froito das característas de produtores "de idade avanzada" e que se dedican "a tempo parcial" á actividade, o que está a derivar en que algunhas producións "se foron abandonando".

No entanto, Roberto García puxo o acento en que, malia que toda a uva foi recollida, os viticultores experimentarán unha caída nos ingresos debido á suma de dous factores: "menos venda" e "o incremento de custos por problemas nas denominacións".