Gómez-Reino reclama que Juan Carlos I deixe de "escapar" e regrese para aclarar se ten contas en paraísos fiscais
Por Europa Press / Redacción | Madrid | 16/11/2020 | Actualizada ás 15:03
Unidas Podemos asegurou que o rei emérito Juan Carlos I ten que deixar de "escapar" e regresar a España para explicar en sede xudicial a orixe da súa fortuna e das súas presuntas contas en paraísos fiscais.
Así o indicou o deputado no Congreso e representante de En Galicia en Común, Antón Gómez-Reino, para valorar as últimas informacións xornalísticas sobre a investigación que afecta a Juan Carlos I.
Concretamente, Gómez-Reino faise eco dalgunhas informacións que apuntan a que o rei emérito tería "como encargado de efectuar determinadas operacións en Suíza a Arturo Fasana, investigado por branqueo no caso Gürtel".
"A cidadanía á que representou como Xefe do Estado merece saber a orixe da súa fortuna. É de imperiosa necesidade que regrese a España e colabore nas investigacións abertas polo Tribunal Supremo", resolveu.
