Josele Santiago e The Limboos abren o calendario de concertos do Outono Códax Festival
Todo apunta a que será un dos pratos fortes desta edición. A actuación terá lugar no Auditorio de Galicia en Santiago este sábado 28 de novembro pero poderá seguirse en liña a partir do luns 30 e durante dez días.
Por X.M. Fernández | Santiago de Compostela | 27/11/2020 | Actualizada ás 21:45
O Outono Códax Festival, encontro galego de ‘música negra’ de referencia internacional, aguanta o tirón mantendo o seu compromiso pola cultura e celebrarase nunha edición especial marcada polas restricións sanitarias. Como novidade, e para chegar ao máximo de público posible, contará cunha edición online dos concertos. Estarán dispoñibles 48 horas despois da súa celebración en directo e durante dez días previa inscrición na páxina web de Bodegas Martín Códax.
Este sábado 28 de novembro empeza xa con forza cun dos pratos fortes do cartel deste ano. Nada máis a nada menos que Josele Santiago e The Limboos xuntos no escenario do Auditorio de Galicia interpretando unha boa selección de temas propios e temas dos anos 50 e dos 60.
Josele Santiago chega a Compostela acompañado polo guitarrista David Krahe, en plena xira do seu disco “Bestieza” co grupo Los Enemigos; mentres que a formación The Limboos, herdeira da mellor tradición dos anos 50, fará gozar aos amantes do R&B. Os organizadores do encontro non queren desvelar detalles do contido da actuación, pero o que poda pasar nesta simbiose no escenario quedará, seguro, para lembranza do Outono Códax Festival.
