Paco Vázquez arrodéase de simpatizantes na Coruña para defender "a Constitución, a Transición e a Coroa"

O exalcalde lamenta as alianzas do PSOE con aqueles que "tiveron como dialéctica o tiro na caluga, a bomba lapa, o secuestro e a extorsión".

Por Europa Press / Redacción | A Coruña | 06/12/2020 | Actualizada ás 19:02

Comparte esta noticia

Centos de persoas, entre elas representantes políticos, acompañaron este domingo ao exalcalde socialista da Coruña Francisco Vázquez, nun acto no que defendeu "a Constitución, a Transición e a Coroa" fronte "a deriva" do actual Goberno de PSOE e Unidas Podemos.

O exalcalde da Coruña Francisco Vázquez intervén durante unha concentración para conmemorar o 42º Aniversario da Constitución Española, na Coruña
O exalcalde da Coruña Francisco Vázquez intervén durante unha concentración para conmemorar o 42º Aniversario da Constitución Española, na Coruña | Fonte: M. Dylan - Europa Press.

Así se pronunciou durante unha concentración celebrada desde as 13,00 horas fronte ao Pazo de María Pita da cidade herculina. Foi convocada polo colectivos Foro LG e Concordia Leal Española para conmemorar o 42º aniversario da aprobación en referendo da Carta Magna de 1978.

No transcurso da súa intervención, a única prevista neste acto, Vázquez reivindicou "o modelo de convivencia política que representou a Transición" e que tivo os seus froitos nunha Constitución que foi "o grande acordo superador das 'dúas Españas'", porque participaron tanto figuras da ditadura como os que viñan "do exilio e dos cárceres".

"Non había vencedores e vencidos", subliñou o tamén exembaixador de España ante a Santa Sé, quen ademais enxalzou a figura da monarquía como "elemento mediador nun proceso tan difícil como foi a reforma política".

REIVINDÍCASE "DE ESQUERDAS"

Francisco Vázquez quixo deixar claro no seu discurso que todos estes valores "non son unha cuestión de esquerdas, de dereitas nin de centro", posto que el, como exsocialista, aínda se reivindica como "de esquerdas". "Hoxe, 42 anos despois, sigo pensando o que sempre pensei e cos mesmos ideais que teño e sempre tiven", insistiu.

Ao seu modo de ver, agora son "outros" os que "teñen que explicar por que abandonaron as posturas do onte". O actual Partido Socialista "deixou atrás o seu compromiso coa Transición e coas posicións que defendeu para formar unha alianza con grupos rupturistas, anticonstitucionais, contrarios á unidade de España", lamentou.

Na mesma semana na que os Orzamentos Xerais do Estado para 2021 saíron aprobados no Congreso co 'si' de partidos nacionalistas e independentistas --entre eles EH Bildu--, Vázquez criticou entre aplausos que o Goberno de Pedro Sánchez se apoiase en formacións "que tiveron como dialéctica política o tiro na caluga, a bomba lapa, o secuestro e a extorsión".

APELA "A TODOS OS CONSTITUCIONALISTAS"

Así, instou ao PSOE e a estes partidos a "explicar como hoxe pretende o contrario" a hai 42 anos: "Resucitar as 'dúas Españas', volver ao pasado a través da memoria democrática e volver dividir aos españois entre bos e malos cambiando unicamente a etiqueta de sitio". Fronte a todo iso, instou "a todos os grupos constitucionalistas" a "axuntar e agrupar esforzos".

Entre os participantes, destacou unha ampla representación do PP galego, entre eles o seu secretario xeral, Miguel Tellado, e o presidente do partido na provincia da Coruña, Diego Calvo, ademais de antigos cargos públicos socialistas da Deputación e do Concello herculino. Cara ao final do acto, todos os presentes mantiveron un minuto de silencio polos falecidos pola pandemia da covid-19.

Unha hora antes desta concentración, Vox celebrou a súa propia ao redor das 12,00 do mediodía, na que se leu un manifesto e varios artigos da Constitución que están "máis ameazados" polo Goberno "de Pedro Sánchez, Pablo Iglesias e Arnaldo Otegi".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

2 YnwK

Fauna friki, coma os lusistas ou o alcalde de Ourense.

1 César

Paco, cinco do PP, seis nostalxicos do franquismo, catro gatos e sen tambor, niso fica tudo.