O Ministerio de Sanidade pon data á chegada das primeiras vacinas: "4 ou 5 de xaneiro"
"Se todo vai segundo o que temos previsto, en maio ou xuño poderiamos ter 15 ou 20 millóns de españois vacinados", resaltou Illa.
Por Europa Press / Redacción | MADRID | 14/12/2020 | Actualizada ás 12:35
O ministro de Sanidade, Salvador Illa, avanzou que as primeiras vacinas contra a COVID-19, previsiblemente a desenvolvida por Pfizer e BioNTech, poderían chegar a España ao redor do "4 ou 5 de xaneiro", tras ser aprobada pola Axencia Europea do Medicamento (EMA, polas súas siglas en inglés) o 29 de decembro "como tarde".
Durante a súa intervención nun almorzo 'en liña' de Nova Economía Fórum, acompañado polo ministro de Inclusión, Seguridade Social e Migracións, José Luis Escrivá, Illa resaltou, en calquera caso, que "non van chegar todas o 4 ou 5 de xaneiro", senón que "van chegar progresivamente cando se vaian fabricando".
O ministro detallou que o "calendario concreto" vai depender da "aprobación definitiva" por parte da EMA. "Eu creo que o 29 de decembro moi probablemente producirase a primeira autorización, o que nos permitirá empezar a vacinar a principios de xaneiro", sinalou Illa, lembrando que a EMA celebrará unha reunión extraordinaria o 29 de decembro sobre a vacina de Pfizer e o 12 de xaneiro en relación á candidata de Moderna.
O ministro explicou que a España lle corresponden uns 140 millóns de doses dos acordos asinados pola Comisión Europea coas compañías farmacéuticas, o que permitirá ao noso país vacinar a 70 millóns de persoas. "Sobrarán vacinas", asegurou, ao que engadiu que ese extra se destinará á cooperación con outros países.
Así, Illa insistiu no "carácter progresivo" do proceso de vacinación. "Se todo vai segundo o que temos previsto, en maio ou xuño poderiamos ter 15 ou 20 millóns de españois vacinados. E ao final de verán unha cifra moi relevante que nos permita estar nun estado moi distinto de materia de control do virus", pormenorizou.
