Por Europa Press / Redacción | Narón | 04/01/2021 | Actualizada ás 20:26
A alcaldesa de Narón, Marián Ferreiro (TeGa), valorou a baixada de casos activos en coronavirus no concello. "Os datos acompáñannos e imos mellorando, cada vez temos menos casos", valora. Con todo, lamentou que "quedar como municipio só, illados, a nivel comercial, e sobre todo na etapa na que estamos, vaise deixar notar na nosa economía".
Así o trasladou a rexedora naronesa tras coñecer á primeira hora da tarde deste luns, 4 de xaneiro, a decisión do comité clínico que asesora á Xunta sobre o paso deste concello a nivel medio de restricións, e deixar de compartir peche perimetral con Ferrol, e facelo en solitario.
"Por quedarnos con algo positivo, o bo é que as cifras de afectados polo coronavirus son menores e tamén a ampliación do horario de apertura e capacidade interior da hostalaría", explica.
De todas as maneiras, a alcaldesa de Narón destacou que o feito de que o concello quede agora como unha "illa", sen compartir peche perimetral con Ferrol, vai supor certo trastorno á poboación de ambos os municipios.
"Son medidas adoptadas moi rápidas, dun día para outro, hai moitas encargas no ámbito comercial entre a poboación dos dous concellos; non hai moita marxe para facer variacións, pero é o que toca, témolo que acatar e faremos cumprir as medidas", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.