Por Europa Press / Redacción | Santiago de Compostela | 08/01/2021 | Actualizada ás 14:18
O presidente da Xunta, Alberto Núñez Feijóo, considerou "sorprendente" que nunha pandemia como a da covid-19 o ministro de Sanidade de España —Salvador Illa— estea "a tempo parcial dedicado á sanidade e outro tempo á súa candidatura".
O máximo mandatario autonómico pronunciouse deste xeito ao ser preguntado durante un acto en Ames pola candidatura do actual responsable de Sanidade do Executivo Estatal, Salvador Illa, á Presidencia da Generalitat de Cataluña polo PSC.
Feijóo asegurou non coñecer "antecedentes" respecto diso. "No momento máis difícil sanitariamente de España, que a autoridade sanitaria estea a tempo parcial dedicado á sanidade e outro tempo á súa candidatura é moi sorprendente", indicou.
Aínda que sinalou que é unha decisión do Partido Socialista que hai que "respectar", sostivo que lle corresponde aos cidadáns de Cataluña e do conxunto de España "avaliar" esta situación.
Feijóo deixou claro que en plena pandemia o ministro de Sanidade "non pode estar a tempo parcial", senón que "ten de estar exclusivamente dedicado á sanidade".
"Non pensaría por un instante que puidese ser designado candidato para algo. A maior honra dun político neste momento en España é xestionar a sanidade pública dos españois", subliñou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.