O dragado da Ría do Burgo podería demorarse ata marzo de 2023
A publicación no BOE contempla un investimento de 20 millóns de euros.
- O dragado da Ría do burgo sae adiante logo de meses de tensión entre Xunta e Goberno
- Mariscadores da ría do Burgo critican as leas entre Goberno e Xunta e que ninguén pague as súas compensacións
Por E.P. | SANTIAGO DE COMPOSTELA | 12/01/2021 | Actualizada ás 13:55
O Boletín Oficial do Estado (BOE) publica a licitación do dragado dos sedimentos da ría do Burgo, cun importe estimado de 20,1 millóns e un prazo de execución de 26 meses, informa a Delegación do Goberno en Galicia. Nun comunicado, o delegado do Goberno, Javier Losada, subliña que, desta maneira, o proxecto de dragado "non ten marcha atrás" e "si ou si esta é a lexislatura da rexeneración deste espazo natural".
Agora a Dirección Xeral da Costa e o Mar, dependente do Ministerio para a Transición Ecolóxica e o Reto Demográfico a través da Secretaría de Estado de Medio Ambiente, ten de prazo para recibir ofertas ata o próximo 2 de marzo. Os orzamentos xerais do Estado deste ano inclúen, ademais, 20 millóns de euros para esta actuación.
En total, serán dragados 583.337,04 metros cúbicos na zona interior da ría, dos cales 223.361,75 metros cúbicos depositaranse nun punto de vertedura ao mar "cun estrito control ambiental, onde se depositan os materiais procedentes dos portos autonómicos". Outros 174.284,89 metros cúbicos aproveitaranse nuns recintos ambientais "cuxa superficie xera espazos verdes e dá continuidade ás sendas ou paseos que bordean a ría" e 185.690,40 metros cúbicos correspóndese co dragado de áridos procedentes da restauración das canles ou bancos marisqueiros. Os 26 meses contemplados na publicación implican que o proxecto, logo de longas e criticadas demoras, podería non estar listo ata o mes de marzo do ano 2023.
