Por Europa Press / Redacción | SANTIAGO DE COMPOSTELA | 21/01/2021 | Actualizada ás 10:07
A Axencia Estatal de Meteoroloxía (AEMET) puxo nome á próxima borrasca que afectará con gran impacto á Península Ibérica e que chegará este xoves despois do paso de 'Gaetán', a primeira dunha sucesión de borrascas que se sucederán polo menos ata o 26 de xaneiro. Bautizada como 'Hortensia' esta será a oitava borrasca de gran impacto da tempada, que comezou o 1 de outubro, e a terceira de 2021.
'Hortensia' chegará hoxe e provocará ao longo do día e, sobre todo, o venres, refachos de vento forte, de máis de 70 quilómetros por hora en Galicia, onde prognosticou ondas de máis de cinco metros de altura.
De feito, o país amenceu este xoves con refachos de vento por encima dos 100 quilómetros hora tanto no litoral como en puntos do interior. Aínda que os refachos máximos rexistráronse na costa --Penedo do Galo (Viveiro), con 122,6 km/h e Punta Candieira (Cedeira) con 111,0 km/h--, o interior tamén é azoutado polos ventos nas primeiras horas deste xoves.
Así, en Vimianzo rozáronse os 110 quilómetros hora minutos antes das 09,00 horas, mentres que na Pontenova se alcanzaorn os 102,1 quilómetros.
E é que a práctica totalidade do territorio galego, coa excepción do noroeste da provincia de Ourense, atópase este xoves en aviso amarelo por ventos, unha alerta que estará activa ata a tarde e elevarase a grao laranxa durante a madrugada ante a previsión de refachos de máis de 100 quilómetros hora.
Nas Rías Baixas, a zona máis afectada polo paso da borrasca 'Gaetan' o mércores, tamén se rexistraron fortes refachos de vento. A máxima na zona ata o momento foi captada en Cabo Udra (Bueu) con 100 quilómetros. En canto ás precipitacións, polo momento son de menor volume que o mércores, cando chegaron a recollerse case 100 litros por metro cadrado en Santa Comba.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.