Un verán cheo de tradicións, cultura, espectáculos e feiras en Allariz

O Concello de Allariz vén de presentar hai uns días a súa Programación de Verán 2025, unha proposta ampla e diversa que convida á veciñanza e ás persoas visitantes a gozar dun verán cheo de cultura, feiras, música, espectáculos, tradicións e actividades ao aire libre. Unha chea de alternativas para completar a experiencia de visitar unha vila que demostra o seu dinamismo e o seu interese por cubrir inquedanzas culturais e de lecer de público de todas as idades.

Alberto Conde, concelleiro de Cultura, acompañado da alcaldesa, Cristina Cid; e de María López, concelleira de Promoción Económica; presentaron a programación destacando "o seu carácter participativo e o seu vínculo co territorio e coa identidade local".

PROGRAMACIÓN XULLO E AGOSTO

O verán comeza con eventos destacados como o FLAZ (Festival Literario de Allariz) que cumpre a súa cuarta edición. Celebrarase os días 4 e 5 de xullo, nunha cita que transforma Allariz nun espazo de diálogo arredor da lectura, a creación e a palabra.

As Festas de San Bieito, que se desenvolverán os días 11,12 e 13 de xullo volverán encher Allariz de música, teatro e tradición. 

Tamén haberá espazo para propostas variadas como o Roteiro Temático de Muíños e Curtumes, unha visita guiada que invita a redescubrir a historia industrial e o patrimonio natural do territorio, e o III Torneo de Fútbol 7, unha cita deportiva xa consolidada que promove o deporte e a participación.

En agosto, o protagonismo será para o folclore, coas Xornadas Internacionais de Folclore, ademais de espectáculos de humor, música ao vivo e actividades pensadas para públicos diversos. A Festa da Empanada, o Tríatlon Vila de Allariz ou a Regata de Piragüismo-Copa Deputación volverán ser momentos de participación e celebración colectiva.

Entre as variadas citas musicais do verán, o 22 de agosto celebrarase o concerto de Budiño–Branca Vela nos Xardíns do Museo do Coiro, nun escenario privilexiado que combina natureza e patrimonio.

AVANCE DE SETEMBRO

Xa en setembro, a programación pon o foco no Festival RiR, na Feira de Artesanía Arte de Man, e na Feira dos Produtos Apícolas. 

ACTIVIDADES PARA A MOCIDADE E MUSEOS

Ademais das citas anteriores, dende o concello informan dunha programación especialmente pensada para a mocidade. Esta iniciativa contempla viaxes de lecer á montaña e á praia; xogos nocturnos como 'atrapa a bandeira' e 'busca do tesouro'; e obradoiros de costumización de roupa, iniciación ao xadrez e creación de 'scape room'. Para estas actividades cómpre anotarse no correo mocidade@allariz.gal e están indicadas con preferencia para público de 13 a 33 anos.

Na web do Concello de Allariz achégase máis información.

Finalmente, dende o concello ourensán convidan tamén a visitar os seus museos: Museo do Xoguete, Museo do Coiro, Museo da Moda, Museo de Arte Sacro de Snta Clara ou Casa Museo Vicente Risco.