Por Jessica Fernández | SANTIAGO DE COMPOSTELA | 28/01/2021 | Actualizada ás 09:00
O Colexio Oficial de Psicoloxía de Galicia creou na rede un “Espazo de Autocoidado”, co obxecto de contribuír a preservar a saúde emocional da comunidade galega, proporcionando ferramentas e recursos para comprir este fin.
Esta iniciativa parte da necesidade de visibilizar e atender á conciencia do autocoidado da nosa saúde mental no contexto da pandemia pola COVID-19, como elemento imprescindible no benestar das persoas e tamén da sociedade no seu conxunto.
A atención ao autocoidado é moi importante neste momento, xa que como comunidade estamos vivindo un verdadeiro desafío, a Covid-19, que supón un risco para a nosa saúde mental ao implicar un alto nivel de estrés.
Así, iranse presentando accións e recursos encamiñados a mellorar a saúde mental a través do coidado propio no espazo online habilitado para o proxecto Autocoidado. Unha destas iniciativas será un programa de oito sesións de mindfulness aberto para a cidadanía.
AUTOCOIDADO
O autocoidado é o modo no que nos coidamos e nos tratamos, supón facernos responsables e comprometernos co noso propio benestar, escoitando e tomando conciencia de “como estou” e “que preciso”.
Coidarse é “ternos en conta desde a amabilidade e o aprecio, e atendernos física, emocional, social e espiritualmente para lograr unha maior satisfacción”, segundo explican desde o Grupo de Traballo de Autocoidado do COPG, que lidera esta actividade.
Ademais, o autocoidado permite unha mellor regulación emocional e permite ser máis resistente ás dificultades da vida cotiá. Tamén favorece sentimentos como a estima, a confianza ou a seguridade, e permite experimentar maior enerxía e optimismo, así como unha maior concentración, polo que mellora o rendemento e a produtividade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.