Feijóo evita facer autocrítica e volve cargar contra o Goberno de Sánchez pola terceira onda da pandemia
BNG e PSdeG critican que non asuma responsabilidades na súa xestión. O presidente galego di que non descarta endurecer as medidas se fai falta pero rexeita o confinamento total.
- O novo anuncio de Feijóo: pide que sexa obrigatorio o uso de máscaras FFPP2 aínda que el non as utiliza
- Pontón crítica a Sánchez e Feijóo en pleno auxe dos contaxios na terceira onda
- Caballero a Feijóo tras os ataques a Sánchez: "Póñase a gobernar e protexa á xente"
Por Europa Press / Redacción | SANTIAGO DE COMPOSTELA | 27/01/2021 | Actualizada ás 17:04
A reunión que o venres manterán o presidente da Xunta, Alberto Núñez Feijóo, e o seu homólogo estatal, Pedro Sánchez, marcou a comparecencia na Cámara do mandatario galego, quen aproveitou para buscar o apoio dos grupos políticos ás propostas que levará á Moncloa, entre duras críticas ao Goberno estatal por "non xestionar nin deixar xestionar" a pandemia. Unhas propostas que, curiosamente, non negociou con socialistas e nacionalistas.
Durante a súa comparecencia para explicar os efectos desta terceira onda da pandemia, Feijóo defendeu a súa xestión e a toma de medidas, entre elas as últimas restricións, que entraron en vigor ás 00,00 horas deste mércores.
Mentres os líderes da oposición --Ana Pontón (BNG) e Gonzalo Caballero (PSdeG)-- afeáronlle a súa "falta de autocrítica" e a súa estratexia de "confrontación", Feijóo replicou que "mentres sexa presidente" atenderá antes ás recomendacións do comité clínico que ás que lle formule calquera partido político. E volveu a insistir en que o confinamento xeral que tería "terribles" consecuencias económicas e sociais, polo que debe ser "o último recurso".
En todo caso, para non xerar "falsas expectativas" a unha "sociedade madura" como a galega, admitiu que non pode pechar a porta a que haxa que endurecer máis as medidas e advertiu que, aínda que os datos galegos de taxa de mortalidade e presión asistencial, por exemplo, son aínda "mellores" que os do conxunto estatal, a Xunta "non dubidará en aplicar medidas máis rigorosas" se é "imprescindible".
E el, engadiu, dará a cara ante os galegos para anuncialas. Farao porque é o presidente --dixo-- dun Goberno "no que ninguén se esconde". No polo oposto situou ao Executivo que dirixe Pedro Sánchez, ao que instou a "asumir as súas responsabilidades", xa que "toda España atópase no pico da terceira onda".
"CONFRONTACIÓN" E "FALTA DE AUTOCRÍTICA"
Pola súa banda, tanto a líder do BNG, Ana Pontón, como o secretario xeral do PSdeG coincidiron ao críticar que Feijóo acuda de novo á "confrontación" co Estado e a culpabilizar á cidadanía para eludir as súas "responsabilidades" na xestión da pandemia. Fronte a iso, emprazáronlle a "anticiparse" e a "porse a gobernar".
A líder nacionalista, que alertou da gravidade dos datos, censurou que "o primeiro" que fixese Feijóo despois do Nadal fose "botar a culpa" aos galegos da situación "sen facer autocrítica" e reprochoulle que "non fose capaz de pór sobre a mesa a única medida que é capaz de cortar de raíz" os contagios que, na súa opinión, pasa por "un confinamento de dúas semanas", ampliable.
O socialista, que censurou a "soberbia" mostrada por Feijóo e chamoulle a "baixarse do pedestal", cargou contra a "política do anuncio continuo" do mandatario galego, a quen lle gusta, dixo, "porse as medallas cando as cousas van ben", pero despois pon o foco na actuación doutras administracións, sobre todo do Goberno, así como na propia cidadanía.
