As palabras de Rueda na UE: “Máis descentralización, máis cohesión e máis cooperación transfronteiriza"

O presidente da Xunta, Alfonso Rueda, apostou ante o pleno do Comité Europeo das Rexións por "máis descentralización, máis cohesión e máis cooperación transfronteiriza" na Unión Europea. Así o reafirmou este mércores na súa intervención no hemiciclo do Parlamento Europeo, onde exerceu como portavoz da delegación española con motivo da declaración conmemorativa dos 40 anos da firma de adhesión de España e Portugal ás Comunidades Europeas.

Na súa intervención ao comezo da sesión plenaria, que realizou íntegra en galego, o titular do Executivo autonómico subliñou que a integración en Europa de España e Portugal supuxo "a consolidación da democracia" e a época de "maior prosperidade" en ámbolos países. "Hoxe en día, ninguén, nin en España nin en Portugal, ten dúbidas de que aquela foi unha magnífica decisión", reivindicou.

Así, asegurou que España recibiu "moitas cousas" da Unión Europea e está "disposta" a "seguir achegando" co obxectivo de "contribuír con ilusión a engrandecer Europa". Por iso, nun contexto no que "as turbulencias internacionais ameazan con sacudir" Europa, o presidente da Xunta ve necesario insistir en "as fórmulas de éxito que converteron a Unión Europea no que é hoxe": "Hai que seguir insistindo en máis descentralización, máis cohesión e máis cooperación transfronteiriza, da que Galicia e Portugal somos referentes".

CATRO DÉCADAS DE "TRANSFORMACIÓN E PROGRESO"

Nesta liña, puxo en valor que "a suma das estruturas e fondos da Unión Europea", xunto con "a determinación" dos cidadáns españois e portugueses, "fixo posible que en catro décadas houbese a transformación e progreso continuado do que gozamos". Por todo iso, Alfonso Rueda reafirmou que España e Portugal "seguen querendo avanzar unidos no medio das incertezas e dificultades" e proclamou: "Máis política rexional, máis unión e máis irmandade sempre significa máis Europa".

Durante a tarde, a delegación española e portuguesa manterán unha reunión coa vicepresidenta de Persoas, Capacidades e Preparación da Comisión Europea, Roxana Minzatu, para abordar a aposta polo talento e formación dos profesionais europeos como ferramenta para competir no escenario internacional. A continuación, Alfonso Rueda volverá intervir ante a 167 sesión plenaria do Comité Europeo das Rexións durante o debate sobre o financiamiento para a transición cara a unha enerxía limpa.

O titular do Goberno galego, Alfonso Rueda, xunto coas delegacións española e portuguesa no Comité Europeo das Rexións. BERNAL REVERT | Fonte: Europa Press