Ratificada a obrigación de achegar un certificado negativo de delitos sexuais para prácticas de enfermaría
O TSXG descarta que a medida sexa "restritiva dos dereitos individuais".
Por E.P. | A CORUÑA | 05/02/2021 | Actualizada ás 17:11
A sección primeira da Sala do Contencioso-administrativo do Tribunal Superior de Xustiza de Galicia (TSXG) confirmou a obrigatoriedade de que o alumnado de enfermaría presente un certificado negativo de delitos sexuais para empezar as prácticas clínicas obrigatorias.
Así o indica nunha sentenza na que desestima o recurso interposto por un estudante da Universidade da Coruña (UDC) contra a resolución do Xulgado do Contencioso-administrativo número 2 da Coruña que rexeitou a súa petición de exención do deber de achegar o documento.
O TSXG descarta no fallo que a medida sexa "restritiva dos dereitos individuais", como alegaba o demandante, ou que se aplicou retroactivamente, pois aínda que o alumno comezou os seus estudos de enfermaría en 2014 e a norma entrou en vigor en 2015, a universidade esixiulle o certificado en 2018, cando ía comezar as prácticas.
CONDENADO CON 14 ANOS
A Sala tamén rexeita o argumento de que esa esixencia restrinxa o dereito á educación do recorrente, quen recoñece que en 2009, cando tiña 14 anos, foi condenado por cometer un dos delitos dos previstos no rexistro de delincuentes sexuais.
"Non se lle impide a realización de estudos de calquera tipo, o que sucede é que se o ensino, na súa fase práctica, entraña a realización de actividades que impliquen contacto habitual con menores, debe presentar o certificado negativo, que está fundado noutro mandato constitucional: o da protección dos menores", subliña o tribunal. Ademais, lembra que o impedimento de obtención do certificado negativo "non é intemporal", pois, como cometeu os feitos cando era menor de idade, finaliza dez anos despois da maioría de idade.
O TSXG explica que neste caso a petición do certificado está xustificada porque un enfermeiro pode ter "un contacto físico directo e estreito con menores no exercicio do seu labor profesional ou nas prácticas clínicas dos estudos".
Tamén indica que é "habitual a presenza de menores en calquera centro sanitario, e iso á marxe de que hai determinados centros en que esa presenza se incrementa e nos que a posibilidade de contacto é aínda maior, como sucede no Hospital Materno Infantil Teresa Herrera da Coruña ou nos servizos de pediatría de calquera centro sanitario"
