Persoal dependente de Política Social acusa de "ninguneo" á conselleira e recorren á Valedora do Pobo
Para o comité a ausencia de compensacións, que os leva a "traballar gratis en fin de ano ou o 25 de xullo", supón "unha vergoña" e un feito "impresentable" que, agora, súmase á negativa de recibir aos traballadores para negociar melloras.
Por E.P. | Santiago de Compostela | 17/02/2021 | Actualizada ás 14:52
O persoal de servizos dependentes da Consellería de Política Social solicitou formalmente a intermediación da valedora do Pobo, María Dores Fernández Galiño, ante a negativa da conselleira do ramo, Fabiola García, a reunirse co colectivo para abordar melloras nas condicións laborais.
Os traballadores suman xa 30 semanas de mobilizacións ás portas das residencias e centros de titularidade autonómica sen que a Consellería que encabeza García atendese a solicitude de manter un encontro directo.
Ante a falta de resposta, o comité intercentros do persoal laboral da Xunta rexistrou este mércores unha petición formal ante o Valedor do Pobo para solicitar a súa intermediación ante o que tachan de "ninguneo" cara aos traballadores que "mantiveron en pé" as residencias de maiores durante a crise sanitaria provocada pola pandemia.
"Estase ninguneando a todo o persoal de atención directa despois destes tempos tan difíciles. Fomos os traballadores os que mantivemos en pé todo o sistema de servizos sociais de Galicia porque estivemos non só nos centros propios da consellería, senón que estivemos e estamos a intervir en centros privados", asegurou o presidente do comité intercentros, Manuel Gallardo, en declaracións a Europa Press ás portas do Alto Comisionado do Parlamento.
Tras censurar que a Administración autonómica "agradeza" o esforzo dos traballadores durante a pandmeia "sen" recibilos, Gallardo puxo o acento en que desde o ano 2012 os empregados dependentes de Política Social non teñen compensación algunha por traballar en domingos e festivos. "Dáse o paradoxo que, cando se está intervindo en residencias privadas, o persoal destas residencias si as teñen", engadiu.
Para o comité, esta ausencia de compensacións, que os leva a "traballar gratis en fin de ano ou o 25 de xullo", supón "unha vergoña" e un feito "impresentable" que, agora, súmase á negativa de recibir aos traballadores para negociar melloras.
Pola súa banda, a representante de CSIF no comité, Mari Carmen Piñeiro, incidiu na necesidade de que a conselleira acceda a recibir aos traballadores e escoitar as súas demandas dun colectivo composto maioritariamente por mulleres que precisan medidas de conciliación.
