O décimo aniversario da Biblioteca de Galicia celebrarase con mostras sobre Pardo Bazán, Xela Arias ou Díaz Baliño
A primeira das exposicións conmemorativas centrarase na ilustradora coruñesa Lolita Díaz Valiño, que conta no Gaiás con máis de 60 pezas e obras orixinais.
Por E.P. | SANTIAGO DE COMPOSTELA | 05/03/2021 | Actualizada ás 19:06
A Biblioteca de Galicia celebra o seu décimo aniversario cun programa de actividades que incluirá unhas cinco exposicións temáticas sobre figuras como as escritoras Emilia Pardo Bazán e Xela Arias ou a ilustradora Lolita Díaz Baliño.
O secretario xeral de Cultura, Anxo Lorenzo, presentou este venres o programa de actividades, que se completará con retrospectivas sobre a ilustración xacobea e os principais fitos da biblioteca na última década, encontros e xornadas con escritores.
Anxo Lorenzo destacou que o obxectivo do programa é pór en valor este equipo, situado na Cidade da Cultura, como "gardiá da memoria documental e bibliográfica" xunto ao Arquivo de Galicia.
Así mesmo, destacou o proceso de dixitalización dos seus fondos que permiten a consulta, a día de hoxe, de máis de 2,5 millóns de páxinas dixitalizadas, ademais de lembrar o seu papel como punto de encontro e escenario de mostras para dar visibilidade a figuras como Rosalía de Castro, Concepción Arenal ou Manuel Antonio.
A primeira das exposicións conmemorativas centrarase na ilustradora coruñesa Lolita Díaz Valiño, que conta no Gaiás con máis de 60 pezas e obras orixinais. A seguinte mostra versará sobre Xela Arias e o 17 de maio e xa no mes de xullo programarase unha exposición sobre a historia da ilustración xacobea. Doutra banda, programarase unha mostra retrospectiva sobre os 10 anos de historia da Biblioteca a partir do mes de outubro, ademais dunha homenaxe a Pardo Bazán con motivo do centenario da súa morte.
