Por Galicia Confidencial | Santiago de Compostela | 15/03/2021 | Actualizada ás 21:40
A CIG vén de presentar denuncia contra a Xunta por non subministrar máscaras FFP2 ao persoal das escolas infantís e os centros de maiores a pesar de ser requirida pola autoridade laboral. Un tipo de máscaras que, curiosamente, recomendaba usar o presidente galego hai unhas semanas e que agora desaconsella o seu Comité Clínico neste tipo de centros.
Este sindicato lembra que nas escolas infantís, centros de día e residencias de maiores dependentes da Consellaría de Política Social, as persoas usuarias non levan máscara (escolas infantís de cero a tres anos) ou non a levan en moitos momentos da xornada (persoas maiores dependentes, menores residentes ou incluso persoas con discapacidade ou diversidade funcional). Unha situación que xa denunciou en agosto "porque os nenos e as nenas non levan máscaras e, evidentemente, non se pode manter a distancia de seguridade".
"Quen ten unha crianza ao seu coidado ten que darlle afecto, o que implica proximidade, hai que collelas no colo para consolalas, darlles de comer e cambialas; momentos estes nos que se expulsa gran cantidade de aerosois", indica nun comunicado. Unha situación que tamén se repite nas residencias de maiores.
A autoridade laboral, despois de realizar as dilixencias oportunas e requirir a protección respiratoria do persoal mediante as máscaras FFP2, manifestou que a Administración galega xa lle comunicou a súa decisión de non proceder a subministrar estes EPI para as escolas infantís e os centros de maiores.
INFORME COMITÉ CLÍNICO
Para xustificar a sua negativa a protexer ao persoal deste risco laboral a consellería de Política Social e o Consorcio achegaron á inspección de traballo un informe do Comité Clínico no que indican que non é necesario usar máscaras FFP2 nestes servizos e, aínda así, segundo a CIG, a autoridade laboral, reitera no seu requirimento e resolve que teñen que subministrar estes EPIS aos cadros de persoal.
"Pero, quen é o comité clínico, do que apenas se sabe nada e é quen de indicar que non se precisa protección respiratoria para traballar con persoas usuarias sen máscara? É o mesmo que lle indicou ao Señor Feijoo que esixira unha resposta do Ministro de Sanidad de que as máscaras FFP2 deberían etar indicadas na poboación xeral?", pregúntase. "Para máis, a conselleira de Política Social, Fabiola García, nas súas visitas aos centros de traballo, preséntase usando as máscaras que non quere dar ao seu persoal", conclúe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.