A pegada de Pontevedra en América: rescatando as historias das mulleres que cruzaron o charco
A USC e a Deputación de Pontevedra desenvolven un proxecto para poñer en valor a historia das mulleres pontevedresas que deixaron Galicia para facer as súas vidas ao outro lado do charco.
Por E.P. | SANTIAGO DE COMPOSTELA | 31/03/2021 | Actualizada ás 16:17
A presidenta da Deputación de Pontevedra, Carmela Silva, e o reitor da Universidade de Santiago de Compostela (USC), Antonio López Díaz, asinaron este mércores un acordo de colaboración para o desenvolvemento do proxecto 'Pontevedra en América: unha mirada en feminino', que rescatará as historias de mulleres da provincia que emigraron a América. A presidenta da deputación explicou que "este proxecto" porá en valor a historia das mulleres da emigración para rescatar a experiencia e a mirada feminina e devolvelas "ao lugar que lles corresponde neste ámbito", que deixou unha "pegada fundamental na sociedade galega".
Trátase dun traballo, enmarcado na Cátedra Iberoamericana, que recupera unha mirada feminina na emigración e que se dividirá en tres acciones. Así, publicaranse as historias en formato dixital, organizarase unha exposición cunha explicación histórica audiovisual sobre este tema e poñerase en marcha un "mentoring" de mulleres que retornan.
'Pontevedra en América: unha mirada en feminino investigará as historias dun grupo de pontevedresas de diferentes ámbitos como a cultura, empresa, docencia, entre outros, que deixaron pegada na emigración. Historiadoras, economistas, sociólogas e artistas desta Cátedra da Universidade compostelá analizarán o seu papel.
A directora da Cátedra Iberoamericana, María Cadaval, sinalou que a Deputación de Pontevedra "está a facer un gran labor en materia de igualdade e este proxecto vai na liña de seguir avanzando nese camiño".
A presidenta Carmela Silva destacou que, con esta iniciativa, porase en valor a historia de "tantas mulleres pontevedresas que foron ignoradas, esquecidas e invisibilizadas pola historia a pesar da súa forte implicación nas migracións laborais e políticas que sucederon no pasado século". Pola súa banda, o reitor da USC, que incidiu en que aínda non hai "igualdade efectiva entre homes e mulleres", considerou "positivo" todo o que se faga e mostrouse "moi satisfeito" por facer realidade este proxecto xunto á Deputación de Pontevedra.
